Ukraina vendos robotë të armatosur në fushën e betejës! Sistemet pa pilot përdoren për sulme dhe mbrojtje

Lufta në Ukrainë po shndërrohet gjithnjë e më shumë në një konflikt të teknologjisë së lartë, ku robotët dhe sistemet pa pilot po marrin një rol gjithnjë e më të madh në fushën e betejës.

Pas përdorimit masiv të dronëve ajrorë dhe mjeteve detare pa ekuipazh, ushtria ukraínase ka nisur një program të gjerë për vendosjen e robotëve të armatosur në tokë.

Këto mjete, të njohura si UGV (Mjete tokësore pa ekuipazh), janë sisteme robotike që operojnë në terren pa praninë direkte të ushtarëve.

Sipas ushtrisë ukrainase, ato janë përdorur tashmë për të zmbrapsur sulme ruse, për të sulmuar pozicione armike dhe madje për të kapur ushtarë kundërshtarë. Në disa raste është raportuar se robotët luftarakë të të dyja palëve janë përballur me njëri-tjetrin në betejë pa praninë e drejtpërdrejtë të njerëzve në zonë.

Një nga mënyrat më të zakonshme të përdorimit të këtyre robotëve është montimi i mitralozëve të tipit Kalashnikov mbi ta. Sipas komandantëve ukraínas, robotët mund të hyjnë në zona ku një ushtar do ta kishte shumë të rrezikshme të operonte.

Disa prej tyre përdoren edhe si mjete kamikaze të mbushura me eksploziv për të shkatërruar pozicione apo strehime të armikut. Ndryshe nga dronët ajrorë, këta robotë lëvizin pothuajse pa zhurmë dhe mund të afrohen pa u vënë re.

Megjithatë, përdorimi i tyre mbetet i kufizuar nga rregullat etike dhe ligji ndërkombëtar humanitar. Shumica e sistemeve janë vetëm pjesërisht autonome: ato mund të lëvizin dhe të identifikojnë objektiva, por vendimi për të hapur zjarr merret gjithmonë nga një operator njerëzor që i kontrollon nga distanca.

Robotët tokësorë përdoren gjithashtu për transportin e furnizimeve dhe evakuimin e të plagosurve. Për Ukrainën, e cila përballet me mungesë të personelit ushtarak, këto sisteme konsiderohen një mënyrë për të reduktuar rrezikun për ushtarët.

Ekspertët paralajmërojnë se me zhvillimin e shpejtë të teknologjisë dhe përdorimin e inteligjencës artificiale, në të ardhmen mund të shfaqen edhe beteja të drejtpërdrejta mes robotëve në fushën e luftës.