Tragjike në Francë/ Dy vëllezër torturuan nënën e tyre, fshehën vdekjen dhe morën kredi në emër të saj

Rasti i Liliane Quanselain, një gruaje rreth 70 vjeç nga fshati Saint-Michel-sur-Meurthe në rajonin Vosges të Francës, ka tronditur opinionin publik.

Gruaja ishte zhdukur në vitin 2022 dhe për disa vite askush nuk e dinte se çfarë kishte ndodhur me të. E vërteta doli në dritë vetëm në vitin 2026, kur autoritetet akuzuan dy djemtë e saj dhe partneren e njërit prej tyre për rrëmbim, torturë dhe fshehje të vdekjes së saj.

Sipas hetimeve, gruaja u pa për herë të fundit në tetor të vitit 2022 në fshatin ku jetonte. Pas kësaj, ajo u zhduk pa lënë gjurmë. Banorët e zonës nisën të shqetësoheshin për mungesën e saj, por rasti u zbulua vetëm në vitin 2026, kur kryetari i bashkisë së komunitetit me rreth 1.700 banorë vendosi të njoftonte autoritetet për zhdukjen e dyshimtë.

Hetimi zbuloi një histori tronditëse. Dy djemtë e saj, 39 dhe 45 vjeç, së bashku me partneren e djalit më të madh, kishin ndërtuar për vite me radhë një histori të rreme për t’i bërë të tjerët të besonin se Liliane ishte ende gjallë. Sipas prokurorit të çështjes, ata përpiqeshin të fshihnin faktin se gruaja jetonte në kushte çnjerëzore dhe se kishte ndërruar jetë si pasojë e keqtrajtimit.

Autoritetet zbuluan se gruaja ishte mbajtur e izoluar për disa muaj në shtëpinë e djalit të vogël. Ajo ishte mbyllur në dhomën e saj, pa kujdes të duhur dhe me shumë pak ushqim. Madje dhoma e saj monitorohej vazhdimisht me kamera të lidhura me telefonat e dy djemve. Gjendja e saj shëndetësore u përkeqësua ndjeshëm dhe, kur vdiq, peshonte vetëm rreth 30 kilogramë.

Sipas dëshmisë së djalit të madh, vëllai i tij e keqtrajtonte nënën dhe në një moment e kishte tundur me force. Pas kësaj ajo kishte ndërruar jetë. Pas vdekjes së saj, dy vëllezërit e fshehën trupin fillimisht në garazh dhe më pas e varrosën në një zonë të pyllëzuar.

Ndërkohë, të akuzuarit vazhduan të përdornin llogaritë bankare të nënës dhe madje morën kredi në emrin e saj për të krijuar përshtypjen se ajo ishte ende gjallë. Ata u kishin thënë policisë, fqinjëve dhe punonjësve socialë se e kishin parë atë edhe në fillim të vitit 2026 dhe madje pretendonin se kishin kaluar festat e Krishtlindjeve së bashku.

Dyshimet e autoriteteve u shtuan pas kundërshtive në deklaratat e tyre. Pas marrjes në pyetje, djali i vogël u akuzua për tortura dhe akte barbarie që çuan në vdekjen e nënës së tij. Djali i madh dhe partnerja e tij u akuzuan për bashkëpunim në krime, rrëmbim dhe mashtrim të organizuar.

Të tre janë vendosur në paraburgim, ndërsa hetimet vazhdojnë për gjetjen e trupit të gruas dhe zbardhjen e plotë të ngjarjes.