“2025 vit i humbur për Kosovën”, çfarë thuhet në draft-raportin e Riho Terras?

Është publikuar draft-raportin për Kosovën i përpiluar nga raportuesi për Kosovën në Parlamentin Evropian, Riho Terras.

Draft-raporti për Kosovën, i përgatitur nga raportuesi i Parlamentit Evropian, Riho Terras, trajton zhvillimet politike dhe ekonomike në vend, sundimin e ligjit, dialogun me Serbinë dhe rrugën integruese drejt Bashkimit Evropian.

Në raport theksohet se viti 2025 u karakterizua nga një ngërç i gjatë politik, i cili ndikoi negativisht në funksionimin e institucioneve. Sipas dokumentit, megjithëse mirëpritet formimi i institucioneve të reja pas zgjedhjeve të parakohshme parlamentare, periudha e gjatë e bllokimit institucional u konsiderua një “vit i humbur” për Kosovën.

Raporti vëren gjithashtu se Kuvendi nuk arriti të zgjedhë një president të ri brenda afatit kushtetues, gjë që e shtyu vendin drejt zgjedhjeve të reja dhe çoi në shpërndarjen e Kuvendit me dekret presidencial në mars 2026.

“Parlamenti Evropian mirëpret formimin e Kuvendit dhe Qeverisë së re të Kosovës më 12 shkurt 2026, pas zgjedhjeve të parakohshme parlamentare të mbajtura në dhjetor 2025 dhe pas më shumë se një viti ngërçi politik; megjithatë shpreh keqardhje për procesin politik të paralizuar gjatë vitit 2025 që rezultoi në një ‘vit të humbur’ për Kosovën; shpreh më tej keqardhje për dështimin e Kuvendit për të zgjedhur një President të ri brenda afatit kushtetues, duke e shtyrë kështu vendin drejt zgjedhjeve të reja; merr në dijeni shpërndarjen e Kuvendit me dekret presidencial më 6 mars 2026”, thuhet në raport.

Raporti rithekson mbështetjen për aplikimin e Kosovës për anëtarësim në Bashkimi Evropian, i dorëzuar në dhjetor 2022. Në këtë kontekst, u bëhet thirrje pesë shteteve anëtare të BE-së që ende nuk e kanë njohur Kosovën të lëvizin drejt njohjes së saj, në mënyrë që vendi të mund të avancojë në procesin integrues në kushte të barabarta me vendet e tjera kandidate.

Po ashtu, Parlamenti Evropian i kërkon Kosovës të përshpejtojë zbatimin e reformave të lidhura me BE-në, sidomos në fushën e sundimit të ligjit dhe mbrojtjes së lirive themelore.

Në planin ndërkombëtar, raporti konfirmon mbështetjen për aplikimin e Kosovës për anëtarësim në Këshilli i Evropës dhe për përfshirjen e saj në programin e NATO të quajtur Partneriteti për Paqen.

Në fund, Parlamenti Evropian u bën thirrje institucioneve evropiane që të heqin masat e mbetura ndaj Kosovës, duke theksuar se ato nuk janë më të justifikueshme dhe se vazhdimi i tyre po ndikon negativisht në shoqërinë kosovare. LINKU