Shpresa e madhe

Pas dy rezultateve jo të pozitive në transfertë, Vllaznia rikthehet të mendojë vetëm për fitore në ndeshjen e radhës në kampionat.

Kuqeblutë vijnë pas humbjes minimale 1-0 ndaj Flamurtari dhe barazimit pa gola 0-0 kundër Egnatia, dy sfida të zhvilluara larg Shkodrës që kanë ngushtuar ndjeshëm garën në krye të renditjes.

Në javën e 29-të të Kategoria Superiore, përballë shkodranëve do të jetë Dinamo, një kundërshtar që gjithmonë kërkon maksimumin dhe që pritet të sjellë një duel të fortë.

Megjithatë, në kampin kuqeblu nuk ka shumë hapësirë për kalkulime: objektivi i vetëm janë tre pikët, të cilat konsiderohen vendimtare për vijimësinë e edicionit. Kuqeblutë rikthehen të mendojnë vetëm për fitore në ndeshjen e radhës në kampionat. Dueli me Dinamon pritet të jetë i fortë dhe shumë i luftuar, por në kampin kuqeblu nuk ka vend për llogari të tjera.

Shpresa e madhe e skuadrës së drejtuar nga trajneri Edi Martini lidhet edhe me faktin se ndeshja e radhës do të luhet në shtëpi.

Fusha e Shkodrës ka qenë një nga pikat më të forta të Vllaznisë gjatë këtij sezoni, aty ku kuqeblutë kanë marrë pjesën më të madhe të pikëve dhe kanë treguar një performancë shumë më bindëse përpara tifozëve të tyre.

Një tjetër arsye pse kjo ndeshje merr rëndësi të madhe lidhet edhe me situatën në renditje. Deri dy javë më parë, Vllaznia kishte krijuar një diferencë prej pesë pikësh nga ndjekësit, duke u dukur në kontroll të plotë të kreut të tabelës.

Megjithatë, dy rezultatet e fundit kanë bërë që kjo epërsi të shkrihet dhe tashmë gara në krye është bërë shumë më e hapur.

Për këtë arsye, përballja ndaj kryeqytetasve konsiderohet një moment kyç për kuqeblutë. Një fitore jo vetëm që do t’i rikthente te suksesi, por do t’i jepte edhe një shtysë të rëndësishme në garën për titull, duke synuar të mbajnë kreun e renditjes në një fazë kur çdo pikë mund të rezultojë vendimtare deri në fund të kampionatit.