Italia paralajmëron se anija cisternë ruse e dëmtuar mund të shpërthejë në Mesdhe në çdo kohë

Një tanker rus i sanksionuar, i ngarkuar me gaz natyror të lëngshëm, po lundron pa kontroll në Mesdhe, pa ekuipazh në bord dhe me një vrimë të madhe në njërën anë, duke nxitur paralajmërime për një “rrezik serioz për një katastrofë të madhe ekologjike”.

Një zyrtar në Itali, një nga nëntë vendet e BE-së që i shkruan një letër të përbashkët Komisionit Evropian duke kërkuar veprim, e ka quajtur Arctic Metagaz një “bombë mjedisore” gati për të shpërthyer.

Tanker-i, pjesë e një flote të errët që transporton naftë dhe gaz rus të sanksionuar, u dëmtua rëndë gjatë një sulmi të dyshuar me dron detar pranë ujërave maltese më herët këtë muaj, raporton BBC, transmeton SInjali.

Ukraina nuk ka komentuar raportimet se ishte përgjegjëse për dëmtimin e tij. Arctic Metagaz tani po lundron drejt jugut, larg ujërave italiane dhe ishullit Lampedusa, drejt Libisë, ndërsa zyrtarët italianë dhe maltezë vazhdojnë ta monitorojnë lëvizjen e tij.

Duke folur për Radio 24 në Itali, sekretari i Këshillit të Ministrave të Italisë, Alfredo Mantovano, tha se rreziqet nga tanker-i janë “të jashtëzakonshme” dhe paralajmëroi se mund të “shpërthejë në çdo moment”.

Thuhet se ai po transporton sasi të “ndjeshme” gaz natyror të lëngshëm (LNG). Një zyrtar në Romë i tha BBC-së se në bord kishte gjithashtu 450 ton naftë dhe 250 ton dizel.

Të martën pasdite, tanker-i ishte rreth 45 milje detare (83 km) larg ujërave territoriale italiane dhe 25 milje nga zona e kërkim-shpëtimit e caktuar për Libinë.

Arctic Metagaz u nis nga porti rus i Murmanskut në shkurt.

Në fillim të marsit, kur mori flakë, presidenti rus, Vladimir Putin, fajësoi Ukrainën për një “sulm terrorist”.