Kosovë–Turqi ose Rumani, dalin në shitje biletat për sfidën vendimtare

Federata e Futbollit e Kosovës (FFK) ka njoftuar se kanë dalë në shitje biletat për ndeshjen që Kombëtarja e Kosovës do ta zhvillojë më 31 mars 2026 në stadiumin Stadiumi Fadil Vokrri, me fillim nga ora 20:45.

Sipas njoftimit, kjo biletë do të jetë e vlefshme për dy skenarë të mundshëm: në rast se Kosova triumfon ndaj Sllovakisë në gjysmëfinale, atëherë ndeshja e 31 marsit do të jetë finale e “Play-Off”-it përballë fituesit të duelit mes Turqisë dhe Rumanisë.

Ndërkohë, në rast të humbjes në Sllovaki, kjo përballje do të zhvillohet si ndeshje miqësore kundër humbësit të çiftit Turqi–Rumani.

FFK ka bërë të ditur edhe çmimet e biletave, të cilat variojnë nga 10 euro për tribunat Veri dhe Jug, 20 euro për Lindje, 30 euro për Perëndim, ndërsa bileta VIP kushton 100 euro. Të gjithë të interesuarit mund t’i sigurojnë biletat përmes platformës online të shpërndarjes së tyre.