Suedia do të përballet me Poloninë

Trajneri i Suedisë, Graham Potter, e ka cilësuar ndeshjen finale të sotme të “play-off” për Kupën e Botës si një mundësi të jashtëzakonshme, pavarësisht një fushate kualifikuese zhgënjyese.

Suedia është vetëm një ndeshje larg kualifikimit në Botërorin që do të zhvillohet në SHBA, Meksikë dhe Kanada, edhe pse në fazën e grupeve ka përfunduar e fundit në Grupin B, pas Zvicrës, Kosovës dhe Sllovenisë.

Pas rezultateve të dobëta në fillim, federata suedeze e ka shkarkuar trajnerin e atëhershëm, duke emëruar Potterin në krye të ekipit.

“Tani ndihet si një mundësi e jashtëzakonshme. Jemi këtu falë asaj që bëri skuadra në Ligën e Kombeve.

Kemi vetëm një ndeshje për të arritur në Kupën e Botës, që është një ëndërr për të gjithë”, ka deklaruar Potter.

Suedia përfitoi një shans të dytë përmes Ligës së Kombeve, pasi fitoi grupin e saj dhe siguroi një vend në “play-off”. Në gjysmëfinale, suedezët e mposhtën Ukrainën me rezultat 3-1.

Kapiteni i ekipit, Victor Lindelof, është shprehur i lumtur për këtë mundësi, pavarësisht vështirësive gjatë kualifikimeve.

“Jemi shumë të kënaqur që kemi këtë shans, edhe pse ndeshjet kualifikuese nuk shkuan siç dëshironim. Liga e Kombeve na dha këtë mundësi dhe jemi të lumtur që jemi në këtë situatë”, ka thënë ai.

Suedia do të përballet me Poloninë në një stadium të mbushur plot, ku pritet një atmosferë e zjarrtë.

“Është gjithmonë e veçantë kur tifozët janë në përkrahjen tonë. Një stadium i mbushur na jep energji dhe motivim shtesë”, ka shtuar Lindelof.