“Na duhet nafta ruse”, kryeministri i Sllovakisë thirrje BE-së: Hiqni sanksionet që Europa të garantojë energji

Kryeministri i Sllovakisë, Robert Fico, ka deklaruar se Bashkimi Evropian duhet të heqë sanksionet ndaj importeve të naftës dhe gazit rus, të ndërmarrë hapa për ta rikthyer furnizimin përmes tubacionit Druzhba dhe të punojë për përfundimin e luftës në Ukrainë, me qëllim përballimin e krizës energjetike të shkaktuar nga lufta dhe tensionet në Iran.

Fico bëri këtë deklaratë pas bisedës telefonike me kryeministrin e Hungarisë, Viktor Orban.

Ai theksoi se BE-ja duhet ta rifillojë dialogun me Rusinë dhe të krijojë kushte që vendet anëtare të sigurojnë furnizimet e munguara me gaz dhe naftë nga të gjitha burimet e mundshme, përfshirë edhe Rusinë.

Hungaria dhe Sllovakia konsiderohen si përjashtim brenda BE-së, pasi vazhdojnë të mbajnë marrëdhënie të afërta me Moskën krahasuar me vendet e tjera anëtare.

Hungaria më herët ka njoftuar se do të ndalojë dërgimin e gazit natyror drejt Ukrainës, duke ndërprerë një nga rrugët kryesore të furnizimit me energji për vendin e goditur nga lufta dhe duke thelluar përplasjen mes Kievit dhe Budapestit për ndërprerjen e furnizimeve me naftë ruse.