Prishtina barazon në finish në sfidën në Skenderaj

Prishtina ka marrë një pikë të madhe në stadiumin “Bajram Aliu’ në Skenderaj.

Drenica dhe Prishtina janë ndarë baras me rezultat 2:2 në takimin e javës së 27-të të Superligës së Kosovës në futboll.

Ronaldo realizoi nga penalltia në minutën e 30-të, duke e kaluar Drenicën në epërsi 1:0.

Golin e barazimit 1:1 e shënoi në minutën e 50-të Mario Ilievski, pas asistimit të Leotrim Kryeziu.

Drenica kaloi sërish në epërsi ndaj Prishtinës. Golin për 2:1 në minutën e 61-të e realizoi Kreshnik Uka.

Kur u mendua se vendasit do të merrnin tri pikët, Leotrim Kryeziu barazoi rezultatin në 2:2 në minutën e 84-të, duke i siguruar një pikë të rëndësishme skuadrës së tij.

Pas këtij barazimi, Prishtina renditet në vendin e tretë me 42 pikë, ndërsa Drenica mban vendin e parafundit (të nëntin) me 29 pikë.