Laimer për kontratën me Bayernin: Gjithçka lidhet me vlerësimin

Konrad Laimer ka folur hapur për situatën e tij te Bayern Munich, duke theksuar se për të më e rëndësishmja në negociatat për kontratën është vlerësimi i kontributit të tij.

Mesfushori austriak konfirmoi se bisedimet për rinovimin e kontratës, e cila skadon në vitin 2027, janë aktualisht në pritje. Ai theksoi se mbetet i qetë për të ardhmen e tij, ndërsa shtoi: “Në fund të fundit, gjithmonë bëhet fjalë për vlerësim. Që paraqitjet që ke bërë ndër vite të njihen në njëfarë mënyre”.

Laimer bëri të ditur se deri tani ka pasur vetëm një bisedë të shkurtër me drejtuesit e klubit, ndërsa më pas komunikimi ka vazhduar kryesisht në formë të shkruar.

Raportimet mediatike sugjerojnë se ekzistojnë dallime mes palëve, sidomos sa i përket aspektit financiar të marrëveshjes.

Megjithatë, ai nuk pranoi të komentojë shifra konkrete, duke shtuar se është i fokusuar te loja dhe te kënaqësia që merr nga futbolli: “Jam në një fazë të caktuar të karrierës, por jam plotësisht i qetë. Është kënaqësi të luaj për Austrinë dhe për Bayernin, pastaj do të shohim si do të zhvillohen gjërat”.

Laimer u shpreh i kënaqur me atmosferën në klubin bavarez, duke theksuar stilin e lojës dhe qartësinë taktike që ekipi ka nën drejtimin e trajnerit.

Ai vlerësoi gjithashtu ambicien e lartë brenda skuadrës, ku sipas tij çdo lojtar jep maksimumin, pavarësisht emrit.

Ndërkohë, drejtori sportiv i Bayernit, Max Eberl, konfirmoi se klubi dëshiron ta vazhdojë bashkëpunimin me Laimerin.

Ai theksoi se bisedimet janë zhvilluar, por aktualisht janë pezulluar për shkak të mospërputhjeve në qëndrime.

Sipas tij, nuk ka asnjë problem apo tension mes palëve, por thjesht nevojitet që idetë të afrohen për të arritur një marrëveshje.