Me tre sulmues kundër Udineses

Masimiliano Alegri ka të drejtë kur thotë: “Në një javë kampionati gjithçka mund të ndryshojë”.

Në fundjavën para Pashkëve, Milani llogariste ende për titullin, por të hënën e Pashkëve skuadra u mposht rëndë nga Napoli (në “Maradona” një ekip pa shpirt, pa agresivitet dhe pa goditje reale në portë), ndërsa që nga e marta ka nisur të shohë pas shpine.

Gara për titull është kthyer tashmë në një “garë të thjeshtë” për Champions. Por në fakt, e thjeshtë nuk është aspak: rikthimi në elitën europiane është vendimtar për ekonominë e sezonit, pasi të ardhurat nga UEFA janë thelbësore për të ndërtuar një merkato të nivelit të lartë. Milani i zbehtë i ndeshjes së fundit duhet të reagojë menjëherë, që në sfidën e radhës kundër Udineze.

Në kalendar vijnë edhe Verona, Juventus, Sasuolo, Atalanta, Xhenoa dhe Kaljari, përballje me skuadra të mesit-poshtë tabelës, ku kuqezinjtë shpesh kanë vuajtur, por edhe duele direkte. Programi deri në maj nuk është aspak i lehtë dhe do të duhen fitore të tjera për të arritur objektivin.

Për fitore të reja duhen gola të rinj; për gola të rinj duhen zgjidhje të reja. Tridenti ofensiv është një opsion që Alegri e kishte përmendur edhe pas humbjes në “Maradona” dhe e provoi konkretisht në stërvitjen e fundit, duke testuar një sulm me tre maja. Në fakt, trajneri ka provuar edhe skemën e zakonshme 3-5-2 dhe vetëm në stërvitjen përfundimtare do të marrë vendimin final. Një vend në sulm duket i rezervuar për Santiago Gimenez, i cili mund të rikthehet titullar pas gjashtë muajsh që nga dëmtimi në kyç.

Nëse sulmi do të jetë me dy lojtarë, partneri i tij mund të jetë Kristian Pulisiç, një dyshe që në fillim të sezonit kishte funksionuar mirë, me amerikanin që përfitonte nga hapësirat e krijuara nga Gimenez.

Nëse Milani zgjedh një qasje më sulmuese me tre lojtarë përpara, atëherë Gimenez do të jetë pika qendrore, Pulisiç në krahun e djathtë, ndërsa në të majtë do të jetë një mes Rafael Leao dhe Kristopher Nkunku. Megjithatë, Leao mbetet ende në dyshim, duke e bërë zgjedhjen përfundimtare të Alegrit edhe më të komplikuar.