Chivu thyen një rekord 88-vjeçar

Një histori e re suksesi po shkruhet te Inter, ku Cristian Chivu është shumë pranë një arritjeje që mungon prej gati një shekulli. Ish-mbrojtësi zikaltër, pasi fitoi tre tituj në Serie A si lojtar, është në prag të triumfit edhe si trajner, një sukses që në Milano nuk është parë që nga sezoni i largët 1937-38.

Në sezonin e tij të parë në pankinë, Chivu ka udhëhequr Interin drejt një dominimi të qartë në kampionat. Gjashtë javë para fundit, zikaltërit kryesojnë renditjen me 9 pikë avantazh ndaj Napoli dhe 12 pikë ndaj AC Milan, duke e bërë titullin pothuajse të sigurt.

Megjithatë, mediat italiane kanë theksuar një detaj interesant: epërsia e Interit nuk është ndërtuar mbi përballjet direkte me rivalët kryesorë.

Në katër sfidat kundër ndjekësve më të afërt, skuadra e Chivu ka regjistruar vetëm një barazim dhe tre humbje. Veçanërisht, dy disfatat në derbin ndaj Milanit kanë lënë gjurmë në analizat e sezonit.

Pavarësisht këtyre rezultateve, rruga drejt titullit të 21-të duket pa kthim për Interin. Nëse konfirmohet, ky sukses do të vulosë një kapitull historik për Chivu, duke e futur atë në një elitë shumë të rrallë të klubit zikaltër.