Andoni Iraola njofton Bournemouthin se do të largohet nga klubi

Andoni Iraola e ka njoftuar Bournemouthin se do të largohet nga klubi kur kontrata e tij të skadojë në fund të sezonit.

Ai pritet të shqyrtojë opsionet e tij këtë verë, me disa vende pune të mundshme në Premierligë që mund të hapen, raporton “The Guardian”.

Largimi i 43-vjeçarit mund të hapë gjithashtu rrugën që trajneri bask të bashkohet me klubin e tij të fëmijërisë, Athletic Bilbaon, por ish-trajneri i Borussia Dortmundit, Edin Terzić, konsiderohet favorit për të pasuar Ernesto Valverden.

E ardhmja e Iraolës ka qenë temë diskutimi për muaj të tërë dhe ai i kishte mbajtur edhe stafin e tij në paqartësi, përpara se të vendoste të largohej nga Bournemouthi pas tre sezonesh në krye.

Futbollistët e Bournemouthit u njoftuan për largimin e tij të planifikuar pas stërvitjes të martën pasdite.

Iraola ka mbajtur dialog të rregullt me drejtorin e futbollit të klubit, Tiago Pinto, dhe drejtorin teknik, Simon Francis, pa u angazhuar për të ardhmen e tij gjatë 15 muajve negociata.

Në një deklaratë të publikuar nga klubi të martën, Iraola tha: “Mendoj se ky është momenti i duhur për t’u larguar, por gjithmonë do të mbaj kujtime fantastike nga ky klub”.

Pronari dhe kryetari i Bournemouthit, Bill Foley, tha: “Andoni ka qenë vendimtar në formësimin e drejtimit të këtij klubi… ai solli intensitet, inovacion dhe një filozofi të qartë që e ngriti Bournemouthin si në fushë ashtu edhe jashtë saj. Jemi jashtëzakonisht mirënjohës për lidershipin e tij dhe do të kemi gjithmonë kujtime të bukura nga bashkëpunimi ynë”.

Bournemouthi, që fundjavën e kaluar mposhti Arsenal dhe po synon përfundimin më të mirë në historinë e tij në Premierligë, kishte shpresuar ta mbante Iraolën, duke besuar se mund të bënte hapa përpara edhe sezonin e ardhshëm nën drejtimin e tij.

Megjithatë, me kalimin e kohës, klubi u pajtua me idenë e largimit të tij.

Të gjitha palët e pranuan nevojën për qartësi para fundit të sezonit dhe Bournemouthi tashmë po përshpejton lëvizjet për zëvendësuesin e tij.

Ish-trajneri i RB Leipzigut dhe Dortmundit, Marco Rose, si dhe trajneri i Ipswich Townit, Kieran McKenna, thuhet se janë në listë.

Iraola është konsoliduar si një nga trajnerët më të vlerësuar në ligë dhe sezonin e kaluar e çoi Bournemouthin në një rekord pikësh, duke barazuar vendin e nëntë të arritur nga Eddie Howe në sezonin 2016-17.

Këtë verë ai ndihmoi klubin të përballojë pa probleme shitjet e lojtarëve kyç si Dean Huijsen, Illia Zabarnyi, Milos Kerkez, Dango Ouattara dhe, në mes të sezonit, Antoine Semenyo, për një shumë totale mbi 250 milionë paund.

Iraola ka zhvilluar 510 ndeshje për Athletic Bilbaon, i cili javët e fundit ka intensifikuar kërkimin për pasuesin e Ernesto Valverdes.

Ai së fundmi e pranoi se është “tifoz” i klubit të La Ligas, por më herët ka lënë të kuptohet se do të preferonte të ruante trashëgiminë e tij atje pas 12 vitesh si lojtar.

Crystal Palace kishte shprehur admirimin për Iraolën pasi Oliver Glasneri konfirmoi në janar se do të largohet nga “Selhurst Park” në fund të sezonit, por Iraola pritet të tërheqë interesin e klubeve më të mëdha.

Në fund të sezonit të kaluar, Iraola la të kuptohej në një intervistë se ky do të ishte sezoni i tij i fundit në pankinën e Bournemouthit.

“Ndonjëherë vjen një moment pas disa sezonesh kur ndjen se mesazhi nuk po arrin te lojtarët në të njëjtën mënyrë,” tha ai.

“Zakonisht trajnerët i ndiejnë këto gjëra dhe marrin vendime sipas momentit”, shtoi ai. Ndeshja e ardhshme e Bournemouthit është ndaj Eddie Howes dhe Newcastle Unitedit në “St James’ Park” të shtunën. Howe nuk e ka mposhtur kurrë ish-klubin e tij si trajner i Newcastlet.