E ardhmja e Pulisiç në pritje

Bisedimet për rinovimin e kontratës së Kristian Pulisiç me Milanin janë aktualisht në pauzë, pavarësisht se agjenti i tij është rikthyer sërish në Milano.

Brenda një muaji, përfaqësuesit e sulmuesit amerikan kanë qenë dy herë në qytet. Deri pak ditë më parë, përgjigjja për rinovimin e kontratës së numrit 11 ishte negative dhe situata nuk duket se ka ndryshuar.

Këtë herë, prania e agjentit nuk lidhet drejtpërdrejt vetëm me Milanin, por edhe me angazhime të tjera, përfshirë një xhirim komercial ku Pulisiç është figura kryesore, ndoshta në bashkëpunim me përfaqësuesen e SHBA-së.

Mbetet për t’u parë nëse do të ketë një vizitë në “Casa Milan” për të diskutuar mbi të ardhmen e lojtarit, por për momentin negociatat për zgjatjen e kontratës duken të ngrira.

Ndërkohë, një tjetër faktor që ndikon në këtë situatë është edhe e ardhmja e trajnerit Masimiliano Alegri.

Spekulimet për një kalim të mundshëm te Kombëtarja janë hedhur poshtë shpejt, por humbja e rëndë 0-3 në shtëpi ndaj Udinezes ka rritur tensionin në ambientin kuqezi.

Në takimin e fundit me skuadrën, Alegri ka zgjedhur qasjen e tij të zakonshme, duke ulur tonet dhe duke përqendruar gjithçka te objektivi kryesor: sigurimi i një vendi në Champions League sezonin e ardhshëm.