Lojtari goditet në kokë dhe bie pa ndjenja, shpërthen përleshja në fushë

Një incident tronditës ka ndodhur në çerekfinalet e Ligës së Kampionëve të Azisë, ku ndeshja mes Johor Darul Ta’zim dhe Al-Ahli u kthye në kaos pas një ndërhyrjeje të rrezikshme në fushë.

Gjatë një momenti loje, Jairo Da Silva i Johor Darul Ta’zim u godit rëndë në fytyrë nga një tentativë me roveshatë nga lojtari kundërshtar Ali Majrashi.

Sulmi rezultoi shumë i fortë, duke bërë që Da Silva të bjerë në tokë pa ndjenja, duke shkaktuar panik të menjëhershëm mes lojtarëve.

Teksa futbollisti qëndronte i shtrirë në fushë, disa lojtarë u përfshinë në përplasje, ndërsa të tjerë kërkonin me dëshpërim ndërhyrjen e stafit mjekësor. Situata u tensionua edhe më shumë kur lojtarët e skuadrës malajziane reaguan me zemërim ndaj vonesës së ndihmës.

Kapiteni Natxo Insa ndërhyri personalisht, duke vrapuar drejt stafit mjekësor dhe duke marrë vetë barelën për ta çuar te shoku i skuadrës, në një skenë që tregoi seriozitetin e situatës.

Pas incidentit, arbitri ndëshkoi me karton të kuq Ali Majrashi, i cili u pa i shkatërruar emocionalisht dhe në lot në fund të ndeshjes. Pavarësisht kësaj, Al-Ahli arriti ta fitonte takimin me rezultatin 2-1.

Sipas raportimeve nga mediat saudite, gjendja e Jairo Da Silva është e qëndrueshme në spital. Ai pritet t’u nënshtrohet ekzaminimeve të mëtejshme në kokë dhe fytyrë për të përjashtuar dëmtime serioze.