Kryebashkiaku Filo, krenar për rikthimin e Skënderbeut

Korça përjetoi një ditë feste më 19 prill, teksa Skënderbeu siguroi matematikisht rikthimin në Superiore, duke rikthyer entuziazmin te tifozët bardhekuq.

Pas këtij suksesi të rëndësishëm, urimet dhe vlerësimet për skuadrën kanë qenë të shumta, jo vetëm nga sportdashësit, por edhe nga përfaqësues të institucioneve vendore.

Mes reagimeve më domethënëse ishte edhe ai i kryebashkiakut të Korçës, Sotiraq Filo, i cili përmes një postimi publik përgëzoi skuadrën për arritjen, duke e cilësuar rikthimin në elitë si një moment krenarie për të gjithë qytetin dhe si një sinjal të qartë për ambiciet e klubit në të ardhmen. Në mesazhin e tij, Filo vlerësoi paraqitjen bindëse të skuadrës në fitoren 4-0 ndaj Kastriotit, rezultat që vulosi ngjitjen e merituar të Skënderbeut në elitën e futbollit shqiptar.

“Rikthehemi atje ku na takon! Djemtë e Skënderbeut kanë dhuruar një performancë spektakolare dhe një fitore bindëse 4-0 ndaj Kastriotit, duke vulosur në mënyrë të merituar rikthimin në Superiore për sezonin e ardhshëm”, shkruan kryebashkiaku.

Më tej, ai e konsideron këtë sukses jo thjesht si një ngjitje kategorie, por si një tregues të qartë të forcës dhe ambicies së klubit korçar.

“Ky nuk është thjesht një rikthim, por një deklaratë force, ambicieje dhe krenarie për gjithë Korçën. Me shpirt gare, përkushtim maksimal dhe një besim të palëkundur, Skënderbeu po rikthehet më i fortë se kurrë për të synuar majat e futbollit shqiptar”.

Në fund të mesazhit të tij, Filo shprehet optimist për të ardhmen, duke lënë të kuptohet se objektivat e Skënderbeut shkojnë përtej rikthimit në Superiore.

“E ardhmja premton suksese edhe më të mëdha!” Rikthimi i Skënderbeut në elitë ka rikthyer optimizmin në Korçë, ndërsa mbështetja institucionale dhe entuziazmi i qytetit tregojnë se klubi bardhekuq pritet të synojë sërish protagonizëm në futbollin shqiptar.