Rodri mungon ndaj Burnleyt

Mesfushori i Manchester City, Rodri, nuk do të jetë i gatshëm për ndeshjen e radhës ndaj Burnley, por trajneri Pep Guardiola ka siguruar se spanjolli nuk do ta humbasë pjesën tjetër të sezonit.

Fituesi i "Topit të Artë" për vitin 2024 ka qenë vendimtar në fitoren me rezultat 2:1 ndaj Arsenal në fundjavë, por është detyruar të largohet nga fusha në minutat e fundit për shkak të një lëndimi.

Guardiola e ka konfirmuar se Rodri nuk do të jetë gati për sfidën e së mërkurës, ku City synon të marrë kreun e tabelës për herë të parë këtë vit.

Megjithatë, ai e ka lënë të hapur mundësinë që mesfushori të rikthehet në ndeshjet e ardhshme, përfshirë gjysmëfinalen e Kupës FA kundër Southampton apo sfidën në kampionat ndaj Everton.

“Për nesër nuk do të jetë gati.

Do të shohim për ndeshjet e tjera”, ka deklaruar Guardiola.

Forma e mirë e Rodrit pas një periudhe të gjatë me lëndime ka qenë vendimtare për rikthimin e City në garën për titull, sidomos në partneritet me Bernardo Silva në mesfushë.

Edhe nëse City fiton ndaj Burnley, skuadra do të jetë vetëm me pikë të barabarta me Arsenal, ndërsa kanë mbetur edhe pesë ndeshje deri në fund të sezonit.

Guardiola ka paralajmëruar se kalendari i mbetur është i vështirë, me përballje ndaj skuadrave të forta si Everton dhe Bournemouth, të cilat synojnë një vend në garat evropiane.

“Ne dhe Arsenal e dimë që nuk kemi hapësirë për gabime. Kalendari është shumë i ngarkuar dhe kundërshtarët janë të fortë”, është shprehur trajneri spanjoll.