Roma bën lëvizje drejt yllit 40-milionësh të La Ligës, që pëlqehet nga Barcelona

E ardhmja e Victor Munozit pritet të jetë një nga temat kryesore të merkatos verore në La Liga, pas një sezoni debutues shumë të mirë me Osasuna.

22-vjeçari ka debutuar edhe me kombëtaren e Spanjës muajin e kaluar, duke shënuar në ndeshjen e parë, ndërsa paraqitjet e tij në “El Sadar” kanë tërhequr vëmendje të madhe.

Munozi ka zgjuar interesim nga ish-klubi i tij Barcelona, por edhe nga Real Madridi, i cili ka një opsion riblerjeje dhe një klauzolë të veçantë në marrëveshje.

Klubi i Osasunës ka refuzuar më parë një ofertë prej 25 milionë eurosh nga Sunderlandi, ndërsa pritet interesim edhe nga klubet e Premierligës.

Së fundmi, Roma është futur fuqishëm në garë dhe thuhet se ka bërë tashmë një ofertë në nivel personal për lojtarin, me një shifër të mundshme rreth 35 milionë euro.

Sipas raportimeve të Jose Alvarez nga “El Chiringuito”, lojtari nuk po nxiton të marrë vendim dhe po i shqyrton opsionet me kujdes.

Munozi thuhet se është i hapur për një rikthim te Barcelona, duke qenë se është nga qyteti dhe ka lidhje familjare atje, por situata komplikohet nga fakti se Real Madridi mund të bllokojë çdo transferim drejt rivalëve katalanas.

Sipas marrëveshjes, kur Osasuna merr oferta për lojtarin, duhet të njoftojë Real Madridin, i cili ka 48 orë kohë për të bërë ofertë kundërshtare dhe për të mbajtur kontrollin mbi të ardhmen e tij.