Rifillimi i furnizimit me naftë, BE miraton paraprakisht kredinë 90 mld euro për Ukrainën, BE: Kredia, një mbështetje jetike

Bashkimi Evropian ka dhënë miratimin paraprak për një kredi prej 90 miliardë eurosh për Ukrainën, pasi Kievi rifilloi pompimin e naftës ruse përmes tubacionit drejt Hungarisë dhe Sllovakisë, duke i dhënë fund një bllokimi disamujor. Vendimi pritet të formalizohet zyrtarisht të enjten.

Rifillimi i furnizimit me naftë përmes tubacionit Druzhba ishte kusht kyç për heqjen e vetos nga Hungaria. Kryeministri në largim, Viktor Orbán, kishte bllokuar pagesën e kredisë në shkurt, duke kërkuar që rrjedha e naftës të rikthehej përpara çdo miratimi financiar.

Autoritetet ukrainase konfirmuan se riparimet e dëmeve të shkaktuara nga sulmet ruse kishin përfunduar dhe furnizimi kishte rinisur.

Menjëherë pas këtij zhvillimi, ambasadorët e BE-së në Bruksel ranë dakord edhe për një paketë të re, të 20-të, sanksionesh kundër Rusisë.

Zyrtarët e BE-së e konsiderojnë kredinë një mbështetje jetike për Ukrainën, ku rreth dy të tretat e fondeve do të përdoren për nevoja mbrojtjeje.

Zëvendëskryeministri ukrainas, Taras Kachka, e përshkroi financimin si “çështje jete a vdekjeje” për vendin. Ndërkohë, shefja e politikës së jashtme të BE-së, Kaja Kallas, theksoi se kjo është një shenjë se Rusia nuk mund ta mposhtë Ukrainën.

Sipas autoriteteve sllovake, presioni në tubacion kishte filluar të rritej të mërkurën dhe furnizimi pritet të arrijë në Sllovaki dhe Hungari brenda të enjtes. Kompania hungareze MOL konfirmoi se pret dërgesat e para së shpejti.