Napoli, Interi, Juventusi e Milani në garë për yllin e Serie A

Mario Gila po tërheq gjithnjë e më shumë interes në merkato, me Napolin që i është bashkuar Milanit, Interit dhe Juventusit në garën për mbrojtësin e Lazios.

Spanjolli, i cili ka kontratë deri në vitin 2027, ka qenë një nga lojtarët më të dalluar të Lazios këtë sezon, duke luajtur rol kyç në arritjen e finales së Coppa Italia nën drejtimin e Maurizio Sarrit.

Paraqitjet e tij të qëndrueshme kanë ndezur një “betejë” transferimesh, me disa klube të mëdha në Itali dhe jashtë saj që po monitorojnë situatën. Mes tyre është edhe Atletico Madridi.

Hyrja e Napolit në garë rrit konkurrencën, pasi ata po kërkojnë përforcime në mbrojtje për sezonin e ardhshëm.

Juventusi, ndërkohë, është në kërkim aktiv të një qendërmbrojtësi cilësor, ndërsa Interi dhe Milani e ndjekin Gilën prej kohësh.

Duke qenë të vetëdijshëm për interesimin në rritje, Lazio ka nisur të përgatitet për një largim të mundshëm.

“Biancocelestët” po synojnë Sergi Dominguez, një mbrojtës 21-vjeçar që luan te Dinamo Zagreb, si zëvendësues potencial.

Aktualisht, Gila po përballet me një problem në kyçin e këmbës të pësuar kundër Atalantas dhe pritet të mungojë në ndeshjen e radhës ndaj Udineses.

Megjithatë, Lazio po e menaxhon me kujdes gjendjen e tij për ta pasur gati në finalen e Kupës së Italisë më 13 maj.

Ndërkohë, e ardhmja e trajnerit Maurizio Sarri mbetet e paqartë, pavarësisht kontratës deri në vitin 2028, pasi disa klube kanë shfaqur interes për të pas rezultateve të mira së fundmi..