Detaje nga përleshja e tifozëve ku mbetën të lënduar dy persona

Pas përfundimit të ndeshjes ndërmjet Prishtinës së Re dhe Drenicës në Hajvali, situata ka degraduar në një përleshje fizike mes tifozërive të të dyja ekipeve, duke lënë pas vetes të lënduar.

Sipas njoftimit zyrtar nga Policia e Kosovës, si pasojë e dhunës ka mbetur e lënduar një femër, ndërsa një mashkull është therrë me thikë. Të dy viktimat kanë pranuar menjëherë tretmanin e nevojshëm mjekësor pas incidentit të rëndë.

Lidhur me këtë ngjarje, Policia ka konfirmuar se është arrestuar një person i dyshuar, i cili me vendim të prokurorit është dërguar në mbajtje për procedime të mëtejshme.

Organet e rendit po vazhdojnë punën për zbardhjen e plotë të rrethanave të përleshjes, ndërsa mbetet të shihet se cilat do të jenë masat disiplinore që do të ndërmarrë Federata e Futbollit ndaj klubeve dhe tifozërive përgjegjëse.