Tensionet në zhveshtore: Si u prish raporti Alonso - Vinicius

Periudha e Xabi Alonso si trajner i Real Madrid u dominua nga një moment i vetëm: shpërthimi i Vinícius Júnior gjatë “El Clasico”.

Zemërimi i anësorit brazilian pasi u zëvendësua në fitoren ndaj FC Barcelona pushtoi titujt kryesorë dhe nxori në pah një problem më të madh – mungesën e kontrollit të trajnerit në dhomat e zhveshjes.

Ky ishte një nga arsyet pse Alonso pranoi të ndërpresë kontratën me Real Madridin pas humbjes në finalen e Superkupës së Spanjës ndaj Barcelonës në janar.

Marrëdhënia e tij me disa nga personalitetet më të mëdha të skuadrës nuk ishte e mirë, veçanërisht me Viníciusin – gjë që vetë lojtari e pranoi disa muaj më vonë.

Megjithëse momenti në “El Clasico” u bë shumë i njohur, përkeqësimi i marrëdhënies mes Viníciusit dhe Alonsos kishte nisur më herët. Sipas Paco González të COPE (përmes Mundo Deportivo), problemet filluan që gjatë Kupës së Botës për Klube verën e kaluar, vetëm pak javë pasi Alonso kishte marrë drejtimin e ekipit.

Raportohet se Viníciusi reagoi ashpër ndaj mundësisë për të mbetur në stol, në një ndeshje ku pritej që në sulm të startonin Kylian Mbappé dhe Gonzalo García. Kjo situatë detyroi Alonson të ndryshonte planet dhe të aktivizonte brazilianin nga minuta e parë.

Alonso nuk ishte perfekt gjatë periudhës së tij te Real Madridi, por pas largimit të tij situata nuk është përmirësuar. Nën drejtimin e Álvaro Arbeloa, “Los Blancos” kanë humbur terren në garën për titull në La Liga, ndërsa janë eliminuar edhe nga Bayern Munich në Ligën e Kampionëve dhe nga Albacete Balompié në Kupën e Mbretit.

Megjithatë, periudha në “Bernabéu” pritet t’i ketë shërbyer Alonsos si një eksperiencë e vlefshme, sidomos në menaxhimin e lojtarëve me personalitet të fortë, duke e përgatitur më mirë për sfidat e ardhshme në karrierë.