Malen i jashtëzakonshëm

Roma po vazhdon me ritëm të lartë garën për një vend në UEFA Champions League, falë formës së jashtëzakonshme të Donyell Malen, i cili po shndërrohet në liderin absolut të skuadrës në momentin vendimtar të sezonit.

Sulmuesi holandez ishte vendimtar edhe në fitoren 2-0 ndaj Bologna-s në “Dall’Ara”, ku realizoi një gol dhe dha një asist, duke konfirmuar formën e tij të shkëlqyer.

Ai e zhbllokoi ndeshjen shumë shpejt me një aksion personal të finalizuar me qetësi para portës, ndërsa më pas u përfshi edhe në aksionin e golit të dytë, duke dhënë pasimin vendimtar.

Që prej ardhjes në janar, Malen është kthyer në pikën kryesore të sulmit romanist, duke shënuar 11 gola në 14 ndeshje në Serie A. Statistikat e tij e vendosin mes afrimeve më efektive të merkatos dimërore në vitet e fundit në kampionatin italian.

Forma e tij e jashtëzakonshme e ka vendosur Romën në një pozicion të fortë në garën për Champions, ndërsa performancat e tij po i afrohen një rekordi të rëndësishëm të mbajtur nga Mario Balotelli për ndikimin e menjëhershëm pas transferimit në Serie A.

Me këtë ritëm, Malen po shndërrohet në simbolin e rikthimit të Romës dhe në lojtarin që mund të bëjë diferencën në javët vendimtare të sezonit.