Presidenti i Serie A reagon pas skandalit të referimit, ka një ‘mesazh’

Presidenti i Lega Serie A, Ezio Simonelli, ka reaguar për skandalin e fundit të referimit në Itali, duke theksuar se nuk mund të japë detaje të mëdha për shkak të natyrës së hetimit.

Të shtunën u bë e ditur se përzgjedhësi i gjyqtarëve Gianluca Rocchi është nën hetim pas një ankese të ngritur nga ish-asistenti i arbitrimit Domenico Rocca në maj 2025.

Ankesa fillimisht ishte arkivuar, por më pas është rihapur dhe po hetohet nga prokuroria në Milano.

Rocchi raportohet se është njoftuar zyrtarisht për hetimin më 24 prill, për dyshime për përfshirje në mashtrim sportiv – një akuzë shumë e rëndë që nuk ishte ngritur as gjatë skandalit të famshëm të “Calciopoli”.

Sipas raportimeve në Itali, ai dyshohet se ka ndikuar në procesin e VAR-it gjatë ndeshjes së Serie A mes Udineses dhe Parmës më 1 mars 2025, duke goditur xhamin e dhomës së VAR-it dhe duke kërkuar rishikim në fushë për një penallti.

Po ashtu ka akuza se ai ka tentuar të ndikojë në përzgjedhjen e gjyqtarit Daniele Doveri, duke e larguar nga disa nga ndeshjet më të rëndësishme të Interit në fund të sezonit 2024-25, me pretendimin se ai nuk ishte “i favorshëm” për “Nerazzurrët”.

Duke folur për mediat, Simonelli tha se duhet pritur përfundimi i hetimeve.

“Duke u bazuar në atë që kam lexuar në media, dua të kujtoj se këto janë vetëm akuza nga hetuesit dhe është detyra e të gjithëve t’i trajtojmë si të tilla. Gjykimet e nxituara apo përfundimet e parakohshme nuk janë të përshtatshme, ndërsa duhet pritur me durim që hetimet të zbulojnë të vërtetën.

Askush nga ne nuk i di detajet dhe kjo është pikërisht detyra jonë deri në vendimin përfundimtar,” deklaroi ai për “Corriere dello Sport”..