Arrestohet mashtruesi në Prizren: U merrte para qytetarëve, paraqitej si person zyrtar

Policia ka arrestuar një person të dyshuar për veprat penale të prezantimit të rremë dhe mashtrimit, me ç’rast ka përfituar shuma të konsiderueshme parash nga qytetarë të ndryshëm, raporton Gazeta e Prizrenit.

Sipas njoftimit, ngjarja ka ndodhur gjatë periudhës 2023–2025 në qytetin e Prizrenit.

I dyshuari, mashkull kosovar, kishte hapur profile të rreme në rrjete sociale, përmes të cilave u merrte para qytetarëve duke u paraqitur si person që kërkonte apo ndihmonte me ndihma sociale.

Përveç kësaj, në disa raste ai është paraqitur rrejshëm si person zyrtar, duke i mashtruar viktimat me premtimin se do t’u ndihmonte në zgjidhjen e çështjeve të ndryshme ligjore, raporton Gazeta e Prizrenit.

Me vendim të prokurorit të shtetit, i dyshuari është dërguar në mbajtje për proceduara të mëtejshme ligjore. Policia po vazhdon hetimet për të parë nëse ka edhe persona të tjerë të dëmtuar nga kjo skemë mashtrimi. /Gazeta e Prizrenit /