AKK-ja paralajmëron mungesë të pagave për punonjësit e disa komunave
- Gazeta e Prizrenit
Në fillim të tetorit, Komuna e Vitisë u përball me vonesë të pagave për disa punonjës të sektorit publik.
Ministria e Financave kishte bërë të ditur se Komuna nuk ka siguruar buxhet të nevojshëm, shkruan IndeksOnline.
“Me qëllim që të mundësohet ekzekutimi i pagave për të gjithë punonjësit e komunës, Thesari i ka dërguar në vazhdimësi njoftime Komunës së Vitisë, përfshirë edhe ditën e djeshme, të cilëve u është dhënë mundësia gjatë gjithë ditës duke i pritur që t’i bëjnë rregullimet e nevojshme për të siguruar buxhet të mjaftueshëm për ekzekutim të plotë të pagave”, kishte njoftuar Ministria.
Ndërkohë, nga Asociacioni i Komunave të Kosovës paralajmërojnë që mund të ketë përsëri probleme me paga.
Drejtori ekzekutiv i këtij Asociacioni, Sazan Ibrahimi, ka deklaruar për IndeksOnline se gjatë nëntorit pritet që 12 komuna të kenë mungesa në paga.
Ibrahimi pohoi se kjo rezulton nga shënimet që AKK-ja ka mbledhur nga komunat.
“Gjatë dhjetorit, nëse vazhdon ky trend i zbatimit të kontratave kolektive, mbi 25 komuna mund të jenë në minus për kategorinë e pagave” tha Ibrahimi.
Sipas AKK-së, përgjegjësi direkte për paga ka qeveria e Republikës së Kosovës, e cila duhet të bëjë zgjidhje njëjtë si ka bërë për komunën e Vitisë e të Suharekës.
“Qeveria duhet të mendojë që të ketë një zgjidhje për paga dhe për kontratë kolektive” tha Ibrahimi.
IndeksOnline ka kontaktuar Ministrinë e Financave për të marrë një deklarim zyrtar, por që deri më tani nuk ka marrë përgjigje.
