Vuçiq kërkon nga SHBA shtyrjen e afatit para vendosjes së sanksioneve

Presidenti serb Aleksandar Vuçiq ka kërkuar një afat më të gjatë përpara zbatimit të sanksioneve amerikane ndaj Industrisë së Naftës së Serbisë, të cilat u vendosën për shkak të kompania është në pronësi të shumicës nga Rusia.

Ai pas një takimi në Beograd sot me zëvendës sekretarin e Shtetit për Menaxhimin dhe Burimet Richard Verma, ka shprehur bindjen se kërkesa e tij do të përballet me mirëkuptim duke thënë se “ai kërkoi të shtyhen afatet...10, 15, 20 ditë”.

Serbia ia shiti NIS-in Gazpromneft-it rus në vitin 2008. Sipas të dhënave zyrtare, Gazprom Neft dhe Gazprom kanë 56.15 për qind pronësi, ndërsa 29.87 për qind është në pronësi të shtetit të Serbisë, ndërsa pjesa tjetër është në duart e qytetarëve, të punësuarve dhe ish-punonjësve, e të tjerë.

Departamenti Amerikan i Thesarit e vendosi NIS në listën e individëve dhe subjekteve të sanksionuara dhe afati për ndryshimin e strukturës së pronësisë është 45 ditë.

Pas takimit me Vuçiq, Verma tha se ndryshimi i strukturës së pronësisë së NIS do të çojë në më shumë paqe në rajon. Ai tha se Serbia nuk do të vuante pasoja ekonomike nëse e largonte Rusinë nga struktura e pronësisë së NIS.

Verma ka thënë se NIS është vetëm një nga 2000 kompanitë në pronësi ruse që SHBA-ja i ka vendosur në "listën e zezë".