Pioli fërkon duart!

Klubet e mëdha në Europë ndoshta duhet të shqetësohen, pasi një prej sulmuesve më premtues në qarkullim, do i bashkohet se shpejti kampionatit të Arabisë Saudite duke injoruar oferta e tyre.

Një rrogë prej 10 milionë eurosh në sezon plus bonuse, padyshim që është shumë tunduese për këdo, sidomos nëse je 21-vjeçar, siç është Xhon Duran.

Sulmuesi kolumbian i Aston Vilës ka qenë zbulimi i vitit të fundit, duke treguar me golat dhe me lojën e tij se është një futbollist i cili do të bëjë emër në arenat më të rëndësishme.

Por duket se këto kanë kaluar në plan të dytë për Duran, pasi Al Nasr i ka ofruar një kontratë katërvjeçare me të drejtë zgjatjen e saj dhe me bonuse të ndryshme apo mundësi rishikimi të parametrave financiarë pas arritjes së objektivave të ndryshëm.

Aston Vila nuk është bërë pengesë, përkundrazi, ka qenë e lumtur kur ka mësuar për ofertën që i është bërë prej 77 milionë eurosh, me bonuse të tjera që mund ta çojnë këtë shifër në 90 milionë euro, edhe pse do të humbasë shumë cilësi në repartin e avancuar.