Shefat në Mynih i hapin “derën” Kimishit: Asnjë mbi klubin

Drejtuesit e Bajern Mynih Maks Eberl dhe Kristof Frojnd u pyetën për të ardhmen e pasigurt të Joshua Kimish. Pas raportimeve se bavarezët kanë tërhequr ofertën e tyre për të vazhduar kontratën e Joshua Kimish, anëtari i bordit sportiv Maks Eberl nuk po përjashton mundësinë që mesfushori të largohet nga klubi si transferim i lirë.

Një zgjatje përtej verës mbetet një mundësi, por nëse palët nuk arrijnë një marrëveshje, Kimish do të bëhet agjent i lirë në fund të sezonit.

“Në përgjithësi, askush nuk është mbi klubin, dhe nëse një lojtar vendos ndryshe, ai vendos ndryshe” tha Eberl për mediat, kur u pyet nëse mesfushori mund të largohej nga klubi si lojtar i lirë. Megjithatë, ai theksoi se Bajern nuk është në atë pikë me Kimish dhe se ai po fliste në terma të përgjithshëm.

Drejtori sportiv Kristof Frojnd, ndërkohë, tha se pret që e ardhmja e Kimish të zgjidhet shumë shpejt. “Ka kaq shumë spekulime, aq shumë është shkruar, aq shumë është raportuar. Ne kurrë nuk kemi dhënë një përditësim për negociatat e kontratës. Ne nuk do ta bëjmë këtë tani. Mund të theksoj vetëm se kemi pasur bisedime vërtet të mira dhe të drejta me Joshuan gjatë muajve të fundit. Do të vazhdojmë ta bëjmë këtë,” tha Frojnd për “DAZN”.