Vendim historik i Gjykatës Kushtetuese në Itali, lejon beqarët të birësojnë fëmijë të huaj

Edhe beqarët mund të adoptojnë të mitur të huaj në një situatë braktisjeje. Gjykata Kushtetuese e Italisë shpalli antikushtetues një pjesë të ligjit të vitit 1983, i cili ndalonte beqarët të birësonin fëmijë të mitur nga jashtë vendit.

Në vendimin e saj, gjykata theksoi se ky ndalim mund të dëmtonte të drejtat e të miturve, duke i privuar ata nga mundësia për të jetuar në një mjedis familjar të qëndrueshëm dhe harmonik.

Vendimi i ri, i cili ndryshon nenin 29-bis të ligjit 184/1983, lejon beqarët të birësojnë fëmijë të huaj që janë në situatë braktisjeje, duke siguruar mundësinë për të krijuar një mjedis të përshtatshëm për të miturin.

Gjykata theksoi se, megjithëse interesat e të miturit janë parësore, duhet të vlerësohen gjithashtu edhe aftësitë e prindërve aspirantë, duke përfshirë aftësitë e tyre emocionale dhe mundësitë për të siguruar edukimin dhe mbështetje për fëmijët.

Ky vendim është një hap i rëndësishëm drejt garantimit të të drejtave të fëmijëve dhe ofron mundësi më të shumta për birësime ndërkombëtare, në një kohë kur aplikimet për birësim janë në rënie.