Ministrat e Shëndetësisë i kërkojnë BE-së masa më të rrepta kundër duhanit dhe produkteve të reja të nikotinës

Ministrat e Shëndetësisë nga 12 vende evropiane i kanë bërë thirrje Komisionit Evropian të përshpejtojë dhe forcojë luftën kundër duhanit dhe produkteve të reja të nikotinës, duke shprehur shqetësimin për vonesat në disa nga iniciativat kyçe të BE-së për kontrollin e duhanit.

Në një letër drejtuar Komisionerit të Shëndetësisë, Oliver Várhelyi, e parë nga Euronews, ministrat nga Belgjika, Estonia, Finlanda, Franca, Irlanda, Letonia, Lituania, Luksemburgu, Malta, Sllovenia dhe Spanja, me nismën e Holandës, theksojnë rritjen e përdorimit të produkteve të reja të nikotinës tek të rinjtë, shitjet ndërkufitare në distancë dhe rolin e platformave të mediave sociale në reklamimin e këtyre produkteve.

“Ju inkurajojmë të ndërmerrni veprime të shpejta dhe vendimtare për të mbrojtur shëndetin e të rinjve tanë dhe për të krijuar një brez pa duhan deri në vitin 2040,” thuhet në letër.

Ministrat kritikojnë vonesat në rregullimin e tregut të duhanit

Në letër vihet në pikëpyetje bllokimi i disa pjesëve të rëndësishme të legjislacionit të duhanit, si Direktiva e Produkteve të Duhanit dhe Direktiva e Taksimit të Duhanit, të cilat fillimisht ishin planifikuar të rishikoheshin në 2022 dhe 2024, sipas Planit Evropian të Mundjes së Kancerit.

“Jemi të shqetësuar për faktin se nuk ka një datë të parashikuar në të ardhmen e afërt për këto rishikime,” shkruajnë ministrat, duke i bërë thirrje Komisionit që t’i publikojë këto propozime legjislative brenda vitit 2025 dhe të sigurojë që ato të jenë të përditësuara me zhvillimet e fundit në tregun e duhanit.

Ministrat kërkojnë gjithashtu prioritizimin dhe ndarjen e burimeve të nevojshme për rishikimin e legjislacionit evropian të kontrollit të duhanit, duke përfshirë të gjitha produktet e reja dhe të ardhshme të duhanit dhe nikotinës.

Ata e konsiderojnë këtë një hap urgjent, duke theksuar zhvillimin e shpejtë të tregut të produkteve të nikotinës dhe ndikimin e tij te të rinjtë.

Mbrojtja e fëmijëve dhe ndalimi i aksesit në produktet e reja të nikotinës

Një pjesë e rëndësishme e letrës fokusohet tek përdorimi në rritje i cigareve elektronike dhe produkteve të tjera të nikotinës nga të rinjtë. Ministrat i kërkojnë BE-së të kufizojë shijet, nivelet e nikotinës dhe paketimin e këtyre produkteve për të reduktuar atraktivitetin e tyre te të rinjtë.

Gjithashtu, ata ngrenë shqetësime për shitjen e produkteve të duhanit dhe nikotinës në internet dhe tregtinë ndërkufitare, duke theksuar se kjo minon përpjekjet kombëtare për të kufizuar aksesin e të rinjve në këto produkte.

Për këtë arsye, ata i kërkojnë Komisionit Evropian të miratojë propozime për të trajtuar në mënyrë efektive sfidat e shitjeve në distancë ndërkufitare dhe për të garantuar që shtetet anëtare të kenë më shumë kontroll mbi tregun e nikotinës dhe duhanit.

Kjo iniciativë vjen në një kohë kur BE-ja përballet me kritika për vonesat në përditësimin e legjislacionit të saj për duhanin, ndërsa përdorimi i produkteve alternative të nikotinës, veçanërisht tek të rinjtë, po rritet me ritme të shpejta.