Kryeministri britanik kërkon forcimin e sanksioneve kundër Rusisë

Nuk ka ardhur ende koha për të hequr sanksionet kundër Rusisë, tha kryeministri britanik Keir Starmer pas samitit të “Koalicionit të Vullnetit” për sigurimin e garancive të sigurisë për Ukrainën, të mbajtur në Paris.

“Përkundrazi, ajo që diskutuam është se si mund të rrisim sanksionet për të mbështetur iniciativën e SHBA-së, për ta sjellë Rusinë në tryezë përmes presionit të mëtejshëm nga ky grup vendesh”, tha Starmer.

Ai gjithashtu vuri në dukje se sesioni, ku morën pjesë rreth 30 shtete, u fokusua në vendosmërinë për të mbështetur Kievin dhe për të siguruar paqen në Ukrainë, duke përfshirë planet për operacione ushtarake në tokë, në ajër ose në det.

Pas konsultimeve midis Rusisë dhe SHBA-së në Riad, Kremlini njoftoi një marrëveshje për zbatimin e nismës së Detit të Zi, duke përfshirë masat për të garantuar sigurinë e lundrimit. Marrëveshjet për Detin e Zi do të hyjnë në fuqi pasi të hiqen sanksionet ndaj bankave ruse që lehtësojnë tregtinë e produkteve bujqësore dhe plehrave minerale.