Anglia e ndërroi fanellën në ndeshjen kundër Shqipërisë prej një gabimi në fanellën e parë

Tifozët që ndoqën ndeshjen e parë të Thomas Tuchel-it si trajner i Anglisë mund të kenë vënë re një ndryshim të vogël në pjesën e përparme të fanellave të ekipit.

Gjatë fitores 2-0 të Anglisë kundër Shqipërisë në ndeshjen e tyre të parë kualifikuese për Kupën e Botës të premten, numrat e skuadrës u vendosën drejtpërdrejt nën logon e prodhuesit të fanellave, Nike, në vend që të ishin në qendër, siç ishte parë në Euro 2024.

Kjo nuk ishte pjesë e një rikonceptimi nga Nike dhe as një shenjë e ndryshimeve nën një regjim të ri, ishte thjesht një gabim.

Përgjegjësi veteran i fanellave të Anglisë, Pat Frost, pranoi në rrjetet sociale se ai e vuri re gabimin pasi shtypi numrin në fanellën e parë dhe nuk kishte zgjidhje tjetër veçse të bënte të njëjtën gjë për të gjitha të tjerat.

“Shtypa fanellën e parë dhe i vendosa numrat në vendin e gabuar, kështu që më duhej t’i vendosja në të njëjtin vend për të gjitha. Do të rikthehen në vendin e zakonshëm të hënën... por bravo që e vutë re.”

Rregulloret e FIFA-s për pajisjet sportive përcaktojnë që numri i një lojtari duhet të shfaqet në pjesën e pasme të fanellës dhe në pantallona të shkurtra, por vendosja e numrit në pjesën e përparme të fanellës varet nga rregullat e kompeticionit dhe nuk ka udhëzime të përcaktuara për vendosjen e tij.

Megjithatë, çdo tifoz që e pëlqeu dizajnin e ri ose që shpresonte për ndonjë fanellë unike për koleksion do të zhgënjehet, pasi Frost konfirmoi se numrat do të riktheheshin në pozicionin e mëparshëm të hënën, kur Anglia do të përballej me Letoninë në ndeshjen e tyre të dytë kualifikuese.

Frost ka punuar për Federatën Angleze të Futbollit (FA) që nga viti 2003, duke filluar me ekipet e të rinjve për meshkuj dhe femra dhe duke u ngritur deri në pozicionin e përgjegjësit të fanellave për ekipet e para.

Më parë, ai ka qenë përgjegjës për fanellat te West Bromwich Albion, skuadër që ai e ndjek “me pasion”, dhe zotëron një kompani transporti që ka kontrata me Federatën Skoceze të Futbollit, Federatën Uellsiane të Futbollit dhe klube të tjera britanike.

Në vitin 2020, ai foli për “The Athletic” rreth jetës si përgjegjës i fanellave.

“Duhet të jesh patjetër i organizuar,” tha ai. “Se ke luksin të harrosh asgjë dhe duhet të sigurohesh që ke besimin e lojtarëve, nëse e humbet atë, nuk ka kuptim të jesh në këtë punë.”