Thuram nuk fshihet,

Personalitet dhe vetëdije… Edhe në intervistën e dhënë për “Onze Mondial”, sulmuesi i Interit, Marcus Thuram, ka shprehur të gjithë bindjen e tij për t’u konsideruar tashmë ndër më të mirët në rolin që luan në fushë, pas rritjes së vazhdueshme që ka treguar gjatë këtyre muajve.

Ja fjalët e tij: “10 sulmuesit më të mirë në botë? Të bëj një renditje të tillë, me dorë, të sulmuesve më të mirë në botë, është diçka shumë e gjerë. Nuk mund ta bëj dhe nuk dua ta bëj. Por, nëse përmes pyetjes tënde më kërkon të mësosh a e konsideroj veten ndër 10 sulmuesit më të mirë në botë, po, jam i bindur se jam ndër 10 sulmuesit më të mirë në botë.

Pse? Sepse sot, në moshën 27-vjeçare, jam në sezonin tim të tretë si sulmues. Kam zhvilluar shumë gjëra, kam bërë shumë rrugë. Po përmirësohem gjithmonë e më shumë në këtë pozicion. Dhe kam fatin që të jap kontributin tim si numër 9”.

Për mentalitetin që duhet të kesh në futboll: “Nuk është e mundur të jesh sportiest i madh pa pasur një karakter të fortë. Kur them karakter të fortë, nuk nënkuptoj karakter të keq, por diçka që në një moment të spikat. Mund të përshkruhet me një veprim të keq ose një shikim të keq. Kjo është arsyeja pse ka një dallim kaq të madh mes një sportisti të nivelit të lartë dhe dikujt që nuk luan në nivel të tillë.

Duhet të kesh një mentalitet që disa njerëz nuk mund ta kuptojnë. Për reagimet, për fjalët që disa mund t’i perceptojnë si të papërshtatshme. Për shembull, Kylian (Mbappé) ka një mentalitet kaq konkurrues, sa ka njerëz që mund ta shohin këtë si arrogance. Në fakt nuk është arrogancë, por thjesht ego e një futbollisti të nivelit të lartë”.

Nëse Anelka, Trezeguet dhe Thierry Henry i kanë dhënë këshilla: “Po, kam diskutuar me ta. Më kanë dhënë këshilla. Këshillat ndryshojnë në varësi të lojtarit dhe asaj që i pëlqen të bëjë. Gjithsesi, një gjë është e sigurt: të flasësh me këto lojtarë kursen shumë kohë.

Një frazë e fortë? Do t’ju them një citim nga Thierry Henry: Nëse ka një veprim që të pëlqen dhe je i mirë në të, duhet të bësh gjithçka për të hyrë në atë pozicion. Nuk duhet të luajmë rastësisht, duhet të arrijmë të krijojmë atë situatë të preferuar. Dhe sa më shumë situata të mund t’i zotërosh, aq më i pakapshëm bëhesh”.

Koncepti i familjes: “Nuk është se kam filluar të jem ‘djali i Lilian’ kur isha 15 vjeç (qesh). Që kur isha i vogël, e kam ditur gjithmonë që babai im luante futboll. Edhe vëllai im i vogël e dinte që babai i tij luante futboll, edhe se vëllai i tij e bënte këtë. Për mua është një arsye krenarie. Jam i lumtur që jam ‘djali i Lilian’.

Imagjinoni, unë jam djali i Lilian Thuram. Unë jam Marcus Thuram. Unë jam vëllai i Khephren Thuram. Nuk shoh arsye për t’u shqetësuar për këtë. Është një arsye krenarie. Babai im ishte një nga mbrojtësit më të mirë në botë. Sot luaj për Interin, fitoj tituj, Khephren luan për Juventusin. Shumë njerëz do të dëshironin të ishin në vendin tonë”.