DOGE pushon të gjithë punonjësit e USAID-it

Ekipi i Elon Musk për shkurtimin e shpenzimeve po përfundon shpërbërjen e Agjencisë Amerikane për Zhvillim Ndërkombëtar (USAID), duke urdhëruar pushimin nga puna të mijëra zyrtarëve vendas, diplomatëve amerikanë dhe zyrtarëve shtetërorë që punojnë jashtë vendit, thanë sot dy ish-zyrtarë të lartë të USAID-it dhe një burim i njohur me situatën.

Të premten, Kongresi u informua se pothuajse të gjithë punonjësit e USAID-it do të pushoheshin nga puna deri në shtator, se të gjitha zyrat e huaja do të mbylleshin dhe se disa funksione do të transferoheshin në Departamentin e Shtetit.

Lëvizja e fundit nga Departamenti i Efiçencës Qeveritare të Musk (DOGE) do të eliminojë në mënyrë efektive atë që ka mbetur nga fuqia punëtore e agjencisë.

"Kjo është padyshim mbyllja përfundimtare," tha një ish-zyrtar i lartë i USAID-it, transmeton KosovaPress.

Në shkurt, presidenti Donald Trump dhe Musk filluan procesin e mbylljes së USAID-it dhe bashkimit të operacioneve të tij me Departamentin e Shtetit për të siguruar që ato të jenë në përputhje me politikën e Trump "Amerika e para".

Ish-zyrtarë dhe një burim i njohur me situatën thanë se zyra e burimeve njerëzore të USAID-it ka njoftuar zyrat rajonale se të gjithë shtetasit e huaj të punësuar në vend, prej të cilëve janë më shumë se 10.000, do të marrin njoftime nga puna duke filluar nga gushti. Ata shtuan se njoftime do tu dërgohen edhe diplomatëve amerikanë dhe punonjësve të qeverisë që punojnë jashtë vendit.

Trump ka pretenduar, pa prova, se agjencia është e mbushur me mashtrime dhe e drejtuar nga "të çmendurit e majtë radikalë", ndërsa Musk e ka akuzuar atë në mënyrë të rreme si një "organizatë kriminale".

Mijëra punonjës të USAID-it morën njoftime nga puna të premten dhe më shumë se 5.000 programe u pezulluan, duke ndërprerë përpjekjet globale të ndihmës humanitare nga të cilat varen miliona.

Sipas Shërbimit Kërkimor të Kongresit jopartiak, USAID mban misione në më shumë se 60 vende dhe shumica e financimit të tij shkon për ndihmën humanitare dhe programet shëndetësore.

Përfituesit më të mëdhenj ishin Ukraina e shkatërruar nga lufta dhe Republika Demokratike e Kongos, aleati i SHBA-së, Jordania, Bregu Perëndimor i pushtuar nga Izraeli dhe Rripi i Gazës i shkatërruar.