Abraham bën presion

Dy protagonistët e mbrëmjes, Hakan Çalhanoglu dhe Tami Abraham, i lanë takim njëri-tjetrit për raundin e ardhshëm, duke thënë se asgjë nuk ka përfunduar.

Mesfushori turk i Interit është përzgjedhur si lojtari më i mirë i ndeshjes, i cili ka thënë se me rëndësi ishte që shmangën humbjen. Ndërkohë që anglezi i Milanit beson që do të fitojnë një tjetër trofe.

ÇALHANOGLU- “Ishte një ndeshje e ekuilibruar. Kishim raste për të shënuar si ne, ashtu edhe Milani.

Pësuam një gol që ishte i evitueshëm, por e barazuam. Ishte e rëndësishme që të mos humbnin, duke parë që kemi edhe një tjetër ndeshje. Do të ketë kohë për të menduar për atë sfidë. Si fillim ne do të përqendrohemi për Parmën.

E dimë që do të jetë një ndeshje e rëndësishme sepse Kupa për ne është një objektiv i madh. Do të mendojmë kur të vijë, por sigurisht që derbi është gjithmonë derbi”.

ABRAHAM- “Jam shumë i lumtur për golin. Ishte shumë i rëndësishëm për ne. Mendoj se ne sulmuesit duhet të jemi gjithmonë gati për të shfrytëzuar rastet që kemi. Jemi një skuadër shumë e fortë. Çdo ndeshje është si një finale. Kemi luajtur shumë mirë, me guxim dhe pasion.

Kështu mund të fitojmë çdo ndeshje. Nuk e di pse këtë guxim nuk e kemi gjithmonë në sezon. Tani duhet të vazhdojmë të shohim përpara. E rëndësishme është që të jemi pozitivë.

Duhet të jemi të përqendruar nga fillimi deri në fund për të fituar derbin e radhës. Kupa është një objektiv për ne dhe duam ta fitojmë. Kemi fituar Superkupën këtë sezon, por sigurisht që nuk jemi të kënaqur”.