Dëshira e madhe e Milanit është Pep Guardiola

Milan shumë shpejt pritet të zyrtarizojë drejtorin e ri sportiv. Bordi i kuqezinjve i udhëhequr nga Gerry Cardinale dhe Giorgio Furlani pritet të vendosin përfundimisht brenda këtyre ditëve për kandidatin e zgjedhur për postin e rëndësishëm.

Pas emërimit të drejtorit sportiv, Milan duhet të gjejë trajnerin e ri, pasi Sergio Conceicao pritet të largohet në fund të sezonit, duke mos arritur asnjë nga objektivat e vendosur kur mori drejtimin e kuqezinjve.

Sipas mediave italiane, në krye të listës së gjatë të kandidatëve për të marrë drejtimin e Milanit është Roberto De Zerbi, i cili aktualisht drejton Olympique Marseille, por është shprehur i gatshëm për të lënë francezët në fund të sezonit dhe të marrë drejtimin e Milan. De Zerbi konsiderohet si një trajner “modern” për skemat dhe mënyrën e lojës që aplikon, e cila rezultoi e suksesshme të paktën në kohën kur drejtoi Brighton në Premier League.

Pavarësisht listës shumë të gjatë me kandidatë për trajnerin e ri, dëshira e madhe e drejtuesve të Milanit është Pep Guardiola. Kuqezinjtë shpresojnë që trajneri spanjoll të ndahet me Man. City në fund të këtij sezoni dhe të tentojnë ta bindin me projektin e tyre.

Gjë që duket e vështirë se mund të ndodhë, por nëse Manchester City nuk arrin të kualifikohet në Champions League për sezonin e ri, nuk do ishte aspak surprizë që Guardiola të largohet në fund të sezonit. Gjithsesi, për momentin De Zerbi është trajneri favorit për të marrë drejtimin e Milanit.