Ervin Ibrahimoviq: Sekretari i Shtetit do të vizitojë Ballkanin

Zëvendëskryeministri, njëherësh shefi i diplomacisë së Malit të Zi, Ervin Ibrahimoviq, ka paralajmëruar një vizitë të sekretarit të Shtetit Marco Rubio në Ballkan, por pa zbardhur agjendën.

Ai në platformën X ka thënë se ka zhvilluar takim me sekretarin amerikan të Shtetit në takimin ministror të NATO-s në Bruksel.

“Biseda e shkurtër, por domethënëse për temat aktuale dypalëshe dhe rajonale, që pata me sekretarin e Shtetit Marco Rubio në takimin ministror të NATO-s në Bruksel, do të vazhdojë në Podgoricë gjatë vizitës së tij në Mal të Zi dhe në rajon, të cilën më njoftoi për këtë vit”, ka shkruar Ibrahimoviq.

“Mezi pres përsëri takimin tonë dhe mundësinë për të diskutuar një sërë temash të rëndësishme me interes të përbashkët me sekretarin e Shtetit të Shteteve të Bashkuara të Amerikës, një nga aleatët dhe miqtë kryesorë dhe strategjikisht të rëndësishëm të Malit të Zi”, ka shtuar ai.

Sekretari i Shtetit Marco Rubio udhëtoi në Bruksel të enjten për një mbledhje të ministrave të jashtëm të NATO-s mes ankthit të lartë për qasjen e administratës Donald Trump ndaj Evropës, duke përfshirë luftën në Ukrainë, marrëdhëniet me Rusinë dhe luftën tregtare në rritje të presidentit Trump me Evropën.

Vizita e Rubio në selinë e NATO-s erdhi pasi marrëdhëniet midis Shteteve të Bashkuara dhe Evropës janë zhvendosur papritur nga bashkëpunimi i ngushtë i epokës Joe Biden në mosbesim dhe ashpërsi nën Trump.

Para Rubio selinë e NATO-s e kishte vizituar sekretari i Mbrojtjes Pete Hegseth në muajin shkurt.