Shqetësuse/ Dodik kërkon aleancë ushtarake me Serbinë e Hungarinë

Miku i Vladimir Putin, Milorad Dodik, ka paralajmëruar se do të kërkojë përfshirjen e Republikës Serbe në një aleancë ushtarake dhe të sigurisë me Serbinë dhe Hungarinë dhe se një gjë e tillë do të zyrtarizohet në një seancë të zgjeruar të Qeverisë së Republikës Serbe më 5 prill.

Pasi shpalli ministren gjermane person të padëshiruar, Dodik nga Banja Lluka tha se “Republika Serbe nuk duhet të jetë kurrë pjesë e NATO-s”.

“Nesër, në seancën e qeverisë, do të kërkojmë përfshirje në një marrëveshje ushtarake me Serbinë dhe Hungarinë. Kemi të drejtë ta bëjmë këtë”, tha Dodik, i cili është i dënuar me një vit burg nga një gjykatë e BeH-së.

Kushtetuta e Bosnje dhe Hercegovinës ndalon qartë entitetet përbërëse të vendit nga marrja e kompetencave në politikën e jashtme dhe në fushën e mbrojtjes. Këto funksione i përkasin vetëm institucioneve qendrore të shtetit.

Sipas kornizës kushtetuese, Republika Serbe dhe Federata Boshnjako-Kroate gëzojnë një nivel autonomie, por çdo marrëveshje ndërkombëtare që lidhet nga entitetet kërkon pëlqimin e Asamblesë Parlamentare të BeH-së, përveç rasteve të veçanta të përcaktuara me ligj.

Ndërkohë, Qeveria e Hungarisë, nën drejtimin e kryeministrit Viktor Orban, ka ndërtuar një marrëdhënie të afërt dhe të fokusuar kryesisht me Republikën Serbe duke e lënë anash komunikimin institucional me të gjithë Bosnje dhe Hercegovinën. Mbështetja hungareze për Qeverinë e Dodik përfshinte edhe një kredi nga banka shtetërore hungareze.

Fotografi nga takimet e mëparshme tregojnë lidhje të forta politike: më 6 nëntor, Orban u takua në Banja Lluka me Dodik dhe kryeministrin e Republikës Serbe Radovan Vishkoviq. Kjo qasje selektive ndaj bashkëpunimit rajonal ka ngritur shqetësime në nivel ndërkombëtar për rrezikimin e sovranitetit dhe integritetit territorial të Bosnje dhe Hercegovinës.

Ekspertë të të drejtës ndërkombëtare dhe përfaqësues të bashkësisë ndërkombëtare pritet të reagojnë ndaj përpjekjeve të vazhdueshme të Dodikut për të minuar funksionimin e shtetit të përbashkët dhe për të ndërtuar bosht të ri politik dhe ushtarak me mbështetjen e Beogradit dhe Budapestit.

Kujtojmë, Dodik u dënua në shkurt me një vit burg dhe u ndalua nga politika për gjashtë vjet për shkak të injorimit të vendimeve të të dërguarit të lartë për BeH. Një gjykatë e BeH ka lëshuar një urdhër-arrest për të dhe aleatët e tij.

Dodik sot shpalli ministren gjermane për Evropën dhe Çështjet Klimatike Anna Luhrmann si person të padëshiruar, pasi kjo e fundit kishte planifikuar një takim në Banja Llukë me përfaqësuesit e Partisë së Progresit Demokratik (PDP), i cili u anulua në minutën e fundit.

Milorad Dodik njoftoi takimin dhe thirri policinë për të shoqëruar ministren.

Gjermania dhe Austria thanë të enjten se do të ndalojnë liderin separatist serb të Bosnjës Milorad Dodik dhe dy ndihmësit e tij më të afërt nga territoret e tyre, duke e akuzuar atë për kërcënim të sigurisë së vendit të tij dhe rajonit.

Dodik ka shkaktuar krizë kushtetuese duke sfiduar vendimet e të dërguarit ndërkombëtar, roli i të cilit është të parandalojë BeH që të rrëshqasë drejt luftës.

Ministrja e Jashtme e Austrisë, Beate Meinl Reisinger, tha të enjten se Dodik i ka çuar provokimet dhe veprimet separatiste në një ekstrem të ri dhe ka kaluar vijat e kuqe ligjore.

"Ne nuk duam të pranojmë më një sjellje të tillë," tha ajo gjatë një vizite në Sarajevë me ministren gjermane Anna Luhrmann.