Çanak: Protestuesit nuk kërkuan rrëzimin e Vuçiçit, udhëtimi në Strasburg propagandë

Gjatë një lidhje live për emisionin “Balkan Talks” në Euronews Albania, politikani serb Nenad Çanak foli mbi situatën më të fundit në Serbi dhe arsyet pse protesta e 15 marsit nuk solli ndonjë zhvillim të madh në dukje.

Sipas Çanak, rrëzimi i Vuçiçit nuk kishte si të ndodhte, pasi as vetë studentët protestues nuk e kishin kërkuar qartë këtë gjë. Po ashtu, ai e quajti si propagandë të zgjuar që disa studentë serbë kanë ndërmarrë një udhëtim drejt Strasburgut, ku do të kërkojnë takim me përfaqësues të Bashkimit Europian. Ai tha se protestuesit në Serbi janë kundër BE-së, po ashtu si dhe vetë Vuçiç, dhe ky udhëtim është thjesht propagandistik.

Moderatori Frango Egro e pyeti Çanak: “Disa studentë serbë kanë ndërmarrë një udhëtim me biçikleta drejt Strasburgut, ku thonë se do të takohen me përfaqësues të Bashkimit Europian? Sipas një studenti ky udhëtim bëhet që më në fund dikush nga Bashkimi Europian të reagojë ndaj situatës në Serbi. Ju e prisni një gjë të tillë?”

Nenad Çanak: “Është një propagandë e mençur dhe inteligjente por është fakt që për 5-6 muaj protesta, unë nuk kam parë një flamur të vetëm të Bashkimit Europian në protesta. Nga ana tjetër, ka pasur shumë flamuj të Kosovës dhe sloganin fashist që thotë ‘mos u dorëzoni’, i cili propozon një ndërhyrje ushtarake në Kosovë. Dhe kjo për shkak të ndikimit të fortë të inteligjencës ruse në Serbi, e cila po futet mes studentëve dhe po mundohet t’i shtyjë ata drejt një axhende ekspansioniste që shkon në favor të Rusisë, sepse Rusisë i duhet tensioni në Ballkan për të larguar vëmendjen nga Ukraina. I duhet kërkuar Bashkimit Europian më shumë vëmendje, gjë që do të ishte legjitime. Vuçiç është një kundërshtar i anëtarësimit në BE dhe është kundër atij pjesës së popullsisë që, sipas tij, ka tradhtuar Kosovën.”

Duke u ndalur te protesta e 15 marsit, ai tha se vetë protestuesit nuk kishin artikuluar qartë dorëheqjen e Vuçiçit, por pavarësisht se në dukje kjo protestë nuk doli sipas pritshmërive të publikut, u arritën disa gjëra, si dorëheqja e kryeministrit, kryetarit të bashkisë së Novi Sadit dhe lëvizje të tjera.

“Problemi kryesor është që njerëzit në Serbi prisnin që më 15 mars do të ndodhte diçka spektakolare, por rezultoi një shpërthim i kotë. Studentët nuk kishin premtuar se 15 marsi do të ishte fundi i regjimit të Vuçiçit, sepse në kërkesat e tyre nuk kërkohej qartë dorëheqja e Vuçiçit. Disa njerëz mendojnë se asgjë s’ka ndryshuar në këto pesë muaj protesta, por jo, nuk është e vërtetë. Qeveria dështoi, kryeministri dha dorëheqjen, kryetari i bashkisë së Novi Sadit po ashtu, dhe shumë njerëz tani janë çliruar nga frika kundrejt anëtarëve të partisë, ndryshe nga çfarë ishin 5 ose 6 muaj më parë. Pra, diçka ka ndryshuar, por në këtë moment kemi një situatë ku Vuçiç do të përpiqet të ndërtojë një qeveri të re, dhe përmes kësaj qeverie dhe këtij reformimi, ai do të fitojë pak kohë. Mendoj se situata është në një ngërç, por studentët janë të vetëdijshëm, bashkë me qytetarët, që nuk ka kthim pas. Protesta e tyre mund të zbehet”, tha Çanak.