Amorim: Mendoj vetëm për derbin, asgjë tjetër

Nesër “Djajtë e Kuq” do të përballen në “Old Trafford” me Manchester City e Guardiolës. Në prag të këtij derbi, Ruben Amorim foli në konferencë për shtyp: “Do të përqendrohemi ndeshje pas ndeshjeje. Kemi pasur disa ditë në dispozicion për t’u rikuperuar nga ndeshja e fundit, më pas do të kemi të tjera.

Vëmendja duhet të përqendrohet më shumë te ndeshja e radhës në Premier League. Duke qenë edhe derbi, duam ta fitojmë këtë ndeshje, duam të përmirësohemi në renditje. Do të fokusohemi plotësisht te kjo sfidë, pa menduar asgjë tjetër.

Garnacho? Mendoj se po bën gjërat e duhura. Sigurisht, si çdo lojtar i skuadrës sonë, duhet të përmirësojë zgjedhjet në një të tretën e fundit të fushës. Duhet të përmirësohemi, të gjithë lojtarët duhet të përmirësohen. Ndoshta Bruno Fernandes është ai që mund të bëjë diçka ekstra, me një asist ose duke shënuar gola.

Duhet të përmirësohemi si skuadër për ta ndihmuar Garnacho. Vetë Garnacho po përmirësohet në mënyrën si mbron, si vrapon, po punon fort dhe ka nevojë të shënojë më shumë gola. E shoh si një djalosh të ri që dëshiron të përmirësohet, po përmirësohet, por nuk është në një moment të mirë në atë repart, siç ndodh edhe me pjesën tjetër të skuadrës”.

Një mendim edhe për lamtumirën nga Premier League të De Bruyne: “Natyrisht, ka qenë një nga lojtarët më të mirë të Premier League. Koha kalon për të gjithë, kështu që është diçka natyrale.

Ai e ka përmirësuar kampionatin anglez. Është në anën e gabuar të Manchesterit (qesh), por i uroj fat të mbarë. Ka qenë kënaqësi ta shihja të luante shumë herë në Portugali, ndaj shpresoj që ta shijojë pjesën tjetër të jetës së tij”.