Trump për sulmin e tmerrshëm në Kiev: Vladimir, stop!

Presidenti i SHBA-së, Donald Trump, dënoi sot sulmet e fundit ruse ndaj Kievit dhe i bëri thirrje presidentit rus Vladimir Putin ti ndalojë ato.

"Nuk jam i kënaqur me sulmet ruse në Kiev. Nuk janë të nevojshme dhe vijnë në një kohë shumë të keqe. Vladimir, stop! 5 mijë ushtarë në javë po vdesin. Le ta përfundojmë marrëveshjen e paqes!", shkroi Trump në Truth Social.

Mbrëmë, Kievi ishte objektiv i sulmeve të kombinuara nga dronë dhe raketa, gjatë të cilave u vranë të paktën nëntë persona dhe u plagosën më shumë se 70, përfshirë gjashtë fëmijë.

Sulmet shkaktuan zjarre dhe shembje ndërtesash në pesë rrethe të qytetit dhe ekipet e shpëtimit janë ende në kërkim të të mbijetuarve nën rrënoja, raporton KosovaPress.

Presidenti ukrainas Volodymyr Zelensky ndërpreu vizitën e tij zyrtare në Republikën e Afrikës së Jugut dhe njoftoi kthimin e tij në atdheun e tij.

Gjatë një takimi me presidentin jug-afrikan Cyril Ramaphosa, Zelensky përsëriti se Ukraina nuk do të pajtohej me një marrëveshje paqeje që përfshin koncesione territoriale, duke përfshirë Krimenë.

Trump ka kritikuar më parë Zelensky për refuzimin e dorëzimit të Krimesë, duke thënë se kjo është një pengesë për arritjen e paqes. Në një postim në rrjetet sociale, Trump tha se Krimea ishte "e humbur vite më parë" dhe "nuk ishte më për debat".

Komuniteti ndërkombëtar, përfshirë Kombet e Bashkuara dhe Bashkimin Evropian, dënuan sulmet ndaj objektivave civile në Kiev, duke i quajtur ato shkelje të ligjit humanitar.