Estonia merr 6 HIMARS nga SHBA-ja

Estonia ka marrë gjashtë sisteme raketore amerikane HIMARS, njoftoi sot Qendra e Investimeve e Mbrojtjes e Estonisë.

Një sistem raketor i lëvizshëm me rreze veprimi deri në 300 kilometra i është dorëzuar ushtrisë estoneze në bazën ajrore Amari..

"Ata kanë ardhur! Kjo forcon jo vetëm mbrojtjen estoneze, por edhe sigurinë e të gjithë aleancës së NATO-s. Estonia tani zotëron me krenari raketat e saj HIMARS, një nxitje e madhe për aftësitë tona të zjarrit indirekt me rreze të gjatë”, ka shkruar kryeshefi i diplomacisë estoneze, Margus Tsahkna në një postim në X.

High Mobility Artillery Rocket System - HIMARS është një sistem artilerie me shumë raketa lëshuese i montuar në një kamion të lehtë.

Ai është prodhuar nga Lockheed Martin dhe mund të lëshojë lloje të ndryshme raketash, duke përfshirë raketa me rreze veprimi deri në 80 kilometra dhe raketa taktike me rreze veprimi deri në 300 kilometra.

Në përgjithësi, ndihma e sigurisë së SHBA-së për projekte të ndryshme të mbrojtjes në Estoni u trefishua midis 2022 dhe 2024 krahasuar me 2019-2021, duke u rritur nga afërsisht 122 milionë dollarë në 430 milionë dollarë.

Kjo mbështetje është përdorur për të rimbushur rezervat e municioneve të kalibrit të madh, për të përmirësuar aftësitë e komunikimit, për të përmirësuar mbikëqyrjen ajrore dhe për të zhvilluar aftësitë e luftimit gjatë natës.

Ministri i Punëve të Jashtme Margus Tsahkna tha se Estonia ka rritur gjithashtu fondet e veta për mbrojtjen në vitet e fundit.

"Është e rëndësishme të mbani mend se për çdo dollar që SHBA-ja vendosi në sigurinë e Estonisë vitin e kaluar, Estonia shtoi 12 të tjerë në buxhetin e mbrojtjes," tha ai në një deklaratë.

Vitin e ardhshëm, shpenzimet e mbrojtjes do të arrijnë në 5 për qind të GDP-së së Estonisë.