Zyrtarisht klubi më i keq në Evropë fshihet në Turqi: Një histori tragjike është arsyeja e humnerës

Zyrtarisht klubi më i keq në Evropë, duke përfshirë 107 liga profesionale të regjistruara në UEFA midis 55 vendeve anëtare, vjen nga Turqia, por rezultatet e tyre janë të justifikuara dhe të pritshme.

Midis 55 anëtarëve të UEFA-s, klubi më i keq për momentin është Yeni Malatyaspor, një ekip që vetëm pesë vjet më parë luante në Ligën e Evropës dhe ishte në pjesën e sipërme të kampionatit në Turqi.

Megjithatë, skuadra aktualisht është në vendin e fundit në Ligën e Dytë të Turqisë me 36 humbje në 36 ndeshje. Ekipi shënoi vetëm 13 gola dhe pranoi plot 138 sosh. Ekipi aktualisht është në vendin e fundit në tabelë me një minus prej 21 pikësh.

Fatkeqësisht, arsyeja për këto rezultate është tragjike. Ky klub turk u prek thellë nga tërmeti shkatërrues që goditi Turqinë dy vjet më parë.

Edhe portieri i këtij klubi turk, Ahmet Eyup Turkaslan, vdiq në tërmet. Trupi i tij u gjet pa shenja jete në rrënojat e krijuara gjatë tërmetit që goditi Turqinë.

Për shkak të atyre skenave tragjike, klubi nuk mori pjesë në garë dhe Federata e Futbollit e Turqisë u përpoq ta shpëtonte klubin duke i rezervuar një vend në divizionin e dytë në mënyrë që të mund të kthehej në garë.

Pas disa muajsh pasiviteti, Malatyaspor u rikthye, por siç pritej, pasuan rezultate katastrofike.

FIFA i përkeqësoi gjërat edhe më shumë për shkak të paqëndrueshmërisë financiare të klubit, duke i hequr 21 pikë. Vërtet, një fund tragjik për një ekip që vetëm pesë vjet më parë luante në garat evropiane dhe ishte një faktor i rëndësishëm në radhët elitare të futbollit turk.