Raportohet se trupi i gazetares ukrainase kthehet nga Rusia me shenja të tmerrshme torture: Mungojnë organe jetike

Trupi i gazetares së re ukrainase, Viktoria Roshchyna, e cila vdiq në robëri ruse pas muajsh të tërë në paraburgim, është kthyer në Ukrainë me shenja të dukshme të torturës më çnjerëzore, kanë bërë të ditur prokurorët ukrainas.

Roshchyna ishte zhdukur në gusht të vitit 2023 gjatë një udhëtimi për raportim në territore të pushtuara nga Rusia. Trupi i saj u kthye në Ukrainë në shkurt 2025, në kuadër të një shkëmbimi të trupave midis Ukrainës dhe Rusisë.

Jurij Belousov, kreu i departamentit për krime lufte në Zyrën e Prokurorit të Përgjithshëm të Ukrainës, deklaroi se ekspertiza forenzike zbuloi “shenja të shumta torture dhe abuzimi, përfshirë gërvishtje dhe gjakderdhje në pjesë të ndryshme të trupit, brinjë të thyer dhe shenja të mundshme të përdorimit të rrymës elektrike”. Mjekët konstatuan se ajo i kishte marrë plagët ndërsa ishte ende gjallë.

Trupi, që Rusia e kishte etiketuar si “mashkull i paidentifikuar”, rezultoi të ishte i gazetares ukrainase pas analizave të përsëritura të ADN-së. Në momentin e hapjes së qeses mortore, u konstatua se brenda ndodhej një trup femre në gjendje të rëndë, që e bënte të pamundur përcaktimin e saktë të shkakut të vdekjes.

Autoritetet ukrainase janë duke bashkëpunuar me ekspertë ndërkombëtarë forenzikë për të ndriçuar rrethanat e vdekjes së saj. Ndërkohë, sipas kolegëve të saj nga “Ukrainska Pravda”, trupi ishte kthyer pa disa organe jetike si truri, globat okularë dhe pjesë të trakesë, çka ngre dyshime për një përpjekje të mundshme për të fshehur shkakun e vdekjes.

Gazetarja Evgeniya Motorevskaya, ish-redaktore në medien Hromadske, ku kishte punuar edhe Roshchyna, tha se ajo ishte jashtëzakonisht e përkushtuar ndaj profesionit. “Për të nuk kishte asgjë më të rëndësishme se gazetaria. Ajo gjithmonë ishte aty ku ndodhnin ngjarjet më të rëndësishme për vendin. Do të kishte vazhduar të punonte me përkushtim për shumë vite, por rusët e vranë”, tha ajo.

Familja e saj e kishte humbur kontaktin me të në gusht 2023, kur ajo ndodhej në një zonë të pushtuar nga Rusia për të raportuar për jetën e njerëzve nën okupim. Vetëm pas nëntë muajsh, Moska pranoi se e mbante në paraburgim, ndërsa në shtator 2024 ajo kishte ndërruar jetë – një informacion që familja e saj e mësoi vetëm një muaj më vonë.

Zëdhënësi i Qendrës Koordinuese të Ukrainës për trajtimin e robërve të luftës, Petro Yatsenko, tha në tetor 2024 se Roshchyna vdiq gjatë transportimit nga qendra e paraburgimit në qytetin jugor rus Taganrog drejt Moskës. Qendra e paraburgimit në Taganrog është e njohur për trajtim çnjerëzor ndaj të burgosurve, dhe më herët, CNN kishte dokumentuar dëshmi për abuzime fizike dhe psikologjike ndaj të ndaluarve atje.

Ky rast tronditës i shtohet mijëra rasteve të tjera të civilëve ukrainas të rrëmbyer dhe deportuar në Rusi pa asnjë akuzë ose proces gjyqësor.