Shkëndija e Tiranës kurorëzohet kampione e Kategorisë së Parë U-17

Shkëndija e Tiranës është ekipi kampion i Kategorisë së Parë U-17, pasi mposhti sot në ndeshjen e fundit të kampionatit Lushnjen me rezultatin 3-2.

Sfida e luajtur në Kamëz ishte vendimtare, pasi diferenca mes ekipeve ishte 3 pikë dhe ekipit të Shkëndijës i mjaftonte vetëm një barazim për të siguruar matematikisht titullin kampion të Kategorisë së Parë U-17.

Pas këtij suksesi, në sezonin e ardhshëm, Shkëndija e Tiranës do të luajë në kampionatin “Abissnet Superiore” U-17.

Pas përfundimit të ndeshjes, u organizua edhe ceremonia e ndarjes së medaljeve dhe dorëzimit të trofeut, ku i pranishëm ishte specialisti i Departamentit të Garave në FSHF, Neritan Koçi.