Giorgia Meloni shpreh dëshirën për të kandiduar sërish në zgjedhjet e ardhshme! Çfarë tha kryeministrja italiane për takimin me Donald Trump

“Dua të kandidoj sërish në zgjedhjet e ardhshme, për t’u thënë votuesve se ne bëmë atë që premtuam”, tha kryeministrja italiane Giorgia Meloni në një intervistë me agjencinë italiane të lajmeve adnkronos .

Duke iu referuar mënyrës se si ka ndryshuar jeta e saj personale që kur u betua si kryeministre e vendit, Meloni tha: “Ajo që më kushtoi më shumë është se kuptova se disa njerëz – për të më lënduar – pa asnjë ndrojtje donin të implikonin familjen time, motrën time, babanë e vajzës sime dhe madje edhe vajzën time. Pothuajse gjithmonë pa asnjë arsye, si pjesë e një strategjie të zakonshme “vrasjeje të karakterit”.

Gjëja tjetër që më bëri përshtypje është se shpesh isha shënjestër e sulmeve seksiste mes indiferencës së përgjithshme të atyre që supozohet se kujdesen për të drejtat e grave.”

Kryeministrja italiane, në të njëjtën kohë, deklaroi se është “veçanërisht e kënaqur që arriti të ndryshojë mënyrën se si vendi i saj u prezantua jashtë vendit”.

“Në mediat në mbarë botën – dhe në ato që tradicionalisht anojnë nga e majta – sot Italia konsiderohet sinonim i besueshmërisë dhe lavdërohet për stabilitetin e saj dhe rezultatet që ka arritur, nga ekonomia te imigracioni”, vuri në dukje Meloni.

Rreth takimit me Donald Trump

Duke iu referuar marrëdhënieve euroatlantike dhe takimit të saj të fundit me Presidentin e SHBA-së Donald Trump në Shtëpinë e Bardhë, Georgia Meloni theksoi: “Jam e kënaqur që takimi im me Trump mund të ketë lehtësuar krijimin e kushteve për fillimin e një dialogu më konkret. Italia punon me qëllimin për t’i afruar të dy anët e Atlantikut, sepse ne besojmë në Perëndimin si një sistem vlerash, aleancash ndërkombëtare dhe marrëdhëniesh ekonomike dhe tregtare. Pikërisht këtë e përmblodha në takimin tim në Shtëpinë e Bardhë me frazën “le ta bëjmë Perëndimin përsëri të madh”. Pozicionet tona si Bashkim Evropian duhet të fillojnë natyrshëm nga mbrojtja e interesave të qytetarëve tanë, pa harruar kurrë se vetëm së bashku – Evropa dhe Amerika – do të jemi në gjendje të jemi të fortë në një realitet ndërkombëtar gjithnjë e më kompleks.”

Për marrëdhënien e saj me von der Leyen

E pyetur për marrëdhënien e saj me Presidenten e Komisionit Evropian Ursula von der Leyen, kryeministrja italiane u përgjigj se “marrëdhënia e tyre e punës tani është e fortë me respekt të ndërsjellë, i cili synon të zgjidhë problemet dhe të jetë sa më i ndershëm të jetë e mundur”.