Inter kërkon ringjallje për titull kundër Veronës

Edhe pse barazimi dramatik 3-3 ndaj Barcelonës i mban gjallë shpresat e Interit për kalim tutje në Ligën e Kampionëve në ndeshjen e kthimit javën e ardhshme, krizat në kampionat janë evidente.

Dy humbje radhazi në Serie A pa shënuar gol kanë bërë që skuadra e Simone Inzaghit të humbasë vendin e parë në tabelë ndaj Napolit, duke e bërë sfidën ndaj Hellas Veronës një detyrim për fitore në garën për mbrojtjen e titullit.

San Siro mund të sjellë më shumë presion sesa siguri, pasi zikaltrit i kanë humbur dy ndeshjet e fundit në shtëpi në të gjitha garat. Një tjetër disfatë do të shënonte herën e parë që Interi pëson tre humbje radhazi në shtëpi në mbi dy vite.

Megjithatë, historia është në anën e tyre – Interi nuk ka humbur asnjëherë ndaj Veronës në shtëpi në Serie A (22 fitore, 11 barazime), përfshirë shtatë fitore radhazi. Ky duel mund të jetë mundësia ideale për të ringjallur ecurinë drejt Scudettos.

Verona vjen në këtë sfidë pas një humbjeje 2-0 ndaj Cagliarit, që zgjati serinë pa fitore në pesë ndeshje (3 barazime, 2 humbje). Edhe pse janë shtatë pikë larg zonës së rënies nga kategoria, një fitore e papritur në San Siro do t’i jepte qetësi skuadrës së Paolo Zanettit. Verona nuk ka humbur tri ndeshje radhazi që nga dhjetori, por hera e fundit përfshinte një shpartallim 5-0 pikërisht nga Interi.

Në transfertë, sfida bëhet më e vështirë – Verona ka pësuar 10 humbje në këtë kampanjë larg shtëpisë, dhe vetëm dy skuadra kanë bilanc më të keq. Sidoqoftë, kanë marrë katër pikë nga tri udhëtimet e fundit (1 fitore, 1 barazim, 1 humbje), prandaj mund të tregohen kokëfortë edhe këtë herë.

Lojtarët për t’u ndjekur: Marcus Thuram shënoi që në minutën e parë kundër Barcelonës dhe dy nga golat e tij kundër Veronës në dhjetor erdhën brenda 25 minutave. Megjithatë, katër nga pesë golat e fundit në Serie A i ka realizuar pas minutës së 60-të.

Daniel Mosquera nuk ka shënuar në gjashtë ndeshjet e fundit, por të gjitha pesë golat e tij këtë sezon kanë ardhur pas minutës së 75-të – një rrezik i vonshëm për Interin.

Statistikë interesante: 14 ndeshje të Interit këtë sezon në Serie A kanë prodhuar mbi 3.5 gola – më shumë se çdo skuadër tjetër në kampionat..