Polonia e Franca paralajmërojnë pakt: Dispozitat e marrëveshjes janë revolucionare

Polonia dhe Franca do të nënshkruajnë një marrëveshje të premten duke u angazhuar për ndihmë të ndërsjellë në rast të një kërcënimi ushtarak, tha kryeministri polak Donald Tusk.

Pakti do të nënshkruhet në një kohë shqetësimesh për sigurinë në Evropë pas pushtimit rus të Ukrainës, e cila kufizohet me Poloninë, dhe mes dyshimeve evropiane për angazhimin afatgjatë të presidentit amerikan Donald Trump për sigurinë e kontinentit.

Marrëveshja, të cilën dy vendet do të nënshkruajnë në qytetin francez Nancy, mbulon çështjet e mbrojtjes, energjisë, bërthamore dhe transportit.

"Dispozita që kemi në marrëveshje është që në rast të një kërcënimi sulmesh ndaj Polonisë ose Francës, të dyja vendet angazhohen për të ofruar ndihmë, përfshirë mbështetjen ushtarake," u tha Tusk gazetarëve përpara se të nisej për në Francë.

"Në përvojën time, dispozitat e marrëveshjes janë revolucionare nga perspektiva e sigurisë sonë."

Tusk tha se pakti i ri hap mundësi për bashkëpunim kur bëhet fjalë për zgjerimin e mundshëm të ombrellës bërthamore franceze në Poloni.

Ai tha se marrëveshja polako-franceze nuk është një "alternativë" e marrëdhënieve polake me Shtetet e Bashkuara.

“Ne kemi nevojë si për Amerikën ashtu edhe për një Bashkim të fortë Evropian, gjithashtu në kuptimin ushtarak”, tha Tusk.

Tusk shtoi se të dy vendet do të ndërmarrin nisma të përbashkëta për të arritur paqen në Ukrainë, por nuk dha detaje të mëtejshme.