Vdes edhe një personalitet tjetër në futbollin e Kosovës, njeriu që dha shumë në kohën e okupimit

Ka ndërruar jetë Remzi Blakqori!

Ikja e tij në amshim është humbje e madhe për futbollin e Kosovës.

“Me pikëllim të madh morëm lajmin për ndarjen nga jeta të Remzi Blakqorit, një emër i njohur për komunitetin e futbollit, veçanërisht në periudhën më të vështirë të historisë sonë, vitet e ‘90-ta.

Në kohë kur sporti zhvillohej nën trysninë e okupimit, në mungesë të kushteve minimale dhe përballë pasigurisë së madhe, Remzi Blakqori nuk e ndali kurrë dashurinë për futbollin.

Ai qëndroi gjithmonë pranë fushës së gjelbër dhe brezave të rinj.

Për shumë vite ishte pjesë e kryesisë së KF Elektroekonomia të Obiliqit (tash FC KEK-u) dhe financues, duke dhënë kësisoj kontribut të jashtëzakonshëm në mbajtjen gjallë të futbollit në kohë okupimi.

Humbja e tij nuk është vetëm dhembje për familjen e ngushtë dhe miqtë, por për gjithë komunitetin sportiv në Kosovë. Ai ishte shembulli i njeriut që jetoi me dhe për futbollin.

Në emër të Federatës së Futbollit të Kosovës, Komitetit Ekzekutiv dhe gjithë komunitetit të futbollit, i shprehim ngushëllimet më të sinqerta familjes Blakqori dhe të gjithë atyre që e njohën dhe e deshën.

I lehtë i qoftë dheu i Kosovës!”, ka shprehur ngushëllime Agim Ademi, president i FFK-së.